Аскетика. Том I - авва Дорофей

Ответ. Должно есть, чадо, имущему кий-либо недуг, вопрошати о нем некоего от отцев, и по совету того творити вся. Иногда бо обретается имый дарование старец и делает потаенно исцеление: и не всегда требует плотских врачей.

Вопрос 532. Аще является мне вещь быти добра, якоже на пример, еже воздержатися, или упражнятися в безмолвии, или дати кому благотворение, и таковая: еда подобает от себе творити? Или быти с советом отцев?

Ответ. Еже не прияти совета отцев о вещи мнящейся добрей, последняя того во зло приходят. И преступает кто заповедь глаголющую: «Сыне, с советом вся твори» (Сир. 32, 21). И оно: «Вопроси отца твоего, и возвестит тебе, старцы твоя, и рекут тебе» (Втор. 32, 7). И нигдеже обрящеши Писание повелевающо кому от себе что творити. Еже бо не прияти совета, гордыня есть. И таковый обретается враг Божий. «Бог бо гордым противится, смиренным же дает благодать» (Притч. 3, 34). И кто будет смирен? Разве точно преклоняяй выю свою ко старцем и приемляй совет их по страху Божию?

Вопрос 533. Аще кто подозревается быти еретик, исповедует же правую веру, убо подобает ли ему веру яти, или ни?

Ответ. Отцы не истязоваху, точию праваго ответствования веры. Аще убо по истине обрящется кто хуля Христа во устех своих и без Него живя, то от сего должно бегати и не приближатися ему. От сердца бо всяк, не храняяй заповедей Христовых, еретик есть. И аще человек не верует в сердце своем, то словеса ничтоже пользуют его.

Вопрос 534. Аще авва чий обрящется имый ересь, еда должен от него отыти брат?

Ответ. Аще совершенно явится, яко имать ересь, то подобает отыти от него. Аще ли же от подозрения единаго, то не подобает отходити, ниже испытовати, яже о нем. Тайная бо суть Самому Богу, а явная человеком.

Вопрос 535. Аще убо авва право мудрствует, на месте же оном чается подвигнутися ересь, и страх, да не когда нужда приидет преступити правую веру, и не хощет преселитися авва той. Брат же, познавая свою немощь, хощет отыти на другое место: еда добре творит, или ни?

Ответ. Прежде времене еже явитися ереси, наносящей нужду, не должен кто отходити: да не когда исполнится на нем оно: «бегает нечестивый, ни единому же гонящу» (Притч. 28, 1). Аще ли же явлена будет, тогда должен есть с советом отец духовных содеяти сие по страху Божию.

Вопрос 536. Что убо? Яко на месте не суть отцы нецыи, о нихже извещение имать, яко могут разсудити вещь ону: еда подобает ему изыти прочее бедства ради ереси и отыти инде, идеже суть могущий разсудити, и тамо вопросити их о сем?

Ответ. Ей, должен есть тако сотворити и глаголемая от них исполнити.

Вопрос 537. Аще кто от отец имать спутствовати ми, и любопрится понести то, еже аз несу, и не подобает, ниже назидает зрящия, яко болий мене есть: что сотворю?

Ответ. Сотвори метание со смирением, да ты сам понесеши. Аще ли же ни тако восприимет, то сотвори вторицею метание, глаголя: прости мя Господа ради, яко не можем совокупно шествовати: соблазн бо последует зрящим. И аще по метании любопретися будет, то не послушай его: сие бо дело есть диаволе.

Вопрос 538. И еда не полезно есть пресещи любопрение оно, и оставити его понести, аще и соблазн зрящим будет? Видится бо зде любопрение злейшо быти соблазна. От двою же злу, негли подобает меньшее избрати.

Ответ. Любопрение по метании бываемое, являет, яко от диавола есть и не должно последовати ему. Отцы бо глаголют, яко излишняя от бесов суть.

Вопрос 539. Брат вопроси великаго старца: аще полезно есть ему безмолвствовати?

Ответ. Хотяй путем Божиим ходити, да не взыщеши себе чести. Путь же Божий кий есть, разве точию да повержет кто волю во всех созади, и еже имети себе последнейшаго всех и малейша всех? Таковый может ходити путем сим. Аще бо кто не отсечет воли своея и не положит упования своего на Господа, не может. И на нем исполняется слово Евангелия: «Ищите и обрящете. Толцыте, и отверзется вам» (Мф. 7, 7). Жизнь и спасение сие есть: еже стяжати поревнуй. Ин бо путь несть, точию сей. Брате, да не будеши поруган.

Вопрос 540. Что сотворю, отче, яко брани утесняют мя и крепятся на мя? И рцы ми, кое есть знамение, еже имети мне упование на Бога: и кое есть знамение прощения грехов? И како есть, еже седети мне по Богу?

Ответ. Брате, время браней время делания есть, да не разслабееши, но делай. Брань твори: егда крепится брань, крепися и ты, зовый: Господи Иисусе Христе, Ты видиши немощь мою и скорбь мою, помози ми и избави мя от гонящих мя, яко к Тебе прибегох (Пс. 141, 7). И помолися прияти силу работати Богови в сердце чистом. Знамение, яко имать кто упование на Бога, есть, еже оттрясти себе от всякаго помысла попечения плоти, и отнюд не помыслити, яко имать нечто века сего: понеже на тое имать упование, а не на Бога. Знамение прощения грехов есть, еже кому возненавидети я и ктому не творити я. Аще ли же еще поучается в них, и слагается сердце его в них, или и делает, то знамение есть, яко еще не прощени суть ему, но обвиняется в них. Еже седети по Богу, есть, еже осуждати кому себе, егда услаждается сердцем о доброте келлии, или в телесном покои своем, и глаголати: увы мне грешному, яко обретаю вещи на осуждение мне, и не достоин есмь онех: а инии достойнии утесняются, обходяще и не обретающе телеснаго покоя! Господи Иисусе Христе, прости мне и за сие имене ради Твоего, нареченнаго на нас. Господь да укрепит тя и утвердит, чадо, да предуспееши и приидеши в меру совершенну. Аминь.

Вопрос 541. Брат вопроси инаго старца Иоанна: отче, помолися о мне Господа ради. И рцы ми: добро ли есть, еже просити нам отцев многажды молитися о нас: аще уже и увериша нас, яко сие творят? И не мнимся ли некако искушати их?

Ответ Иоанна. Брате, многажды написах тебе о молитве, яко по заповеди Божией должни есмы молитися друг за друга: наипаче, егда и просими есмы от друг друга сие творити, то много паче должники обретаемся. Не можем убо не сотворити силу нашу. А о еже просити молитвы отец наших, полезно есть. Глаголет бо: «молитеся друг за друга» (Иак. 5, 16). И паки: «не требуют здравии врача, но болящии» (Лк. 5, 31). И не подобает нерадети о сем поминая безочство (настойчивость) вдовы оныя к неправедному князю. И понеже весть Отец наш Небесный, ихже требуем прежде еже просити Его, то почто не рече: не просите? Вем бо, чесо хощете, прежде неже вам просити Мя. Но Сам рече: «Просите, и примете» и прочая (Мф. 7, 7). Темже убо, добро есть еже просити, да приимем по Его обетованию. Прося же молитвы, тако рцы: авво, зле стражду: молю тя, помолися о мне, якоже веси, яко требую милости Божия. И якоже хощет, Бог сотворит с тобою милость Свою. Того бо есть человеколюбие и Того есть слава, вовеки, аминь.

Вопрос 542. Аще кто ядый купно с братиею скорее приимет потребу свою, добро ли есть просити авву, да востанет? Или да пребудет, дондеже вси востанут? Аще ли же меру хлеба соразделит на вся варения, кое есть лучшо?

Ответ. Селя кто на трапезе, аще увидит, яко бысть его потреба, и не может седети не ядый, да просит востати. А еже седети и не ясти, больше того есть. А еже распростерти частицу свою на вся варения, сие добрейше есть обою.

Вопрос 543. Братия, хотяще воздержатися, вопросиша авву, аще повелит им востати прежде брати от трапезования, за еже не мощи седящим победити чрева. И авве повелевшу им востати, нецыи соблазнишася и оклеветоваху их, не разумеюще сущую от сего пользу. И послаша вопрошающе тогожде старца о сем.

Ответ. Онии убо, яко делатели и внимающии своим душам, творят сие подвизающеся на воздержание, да не когда, внегда седети, полакомятся еще прияти от предложенных. Совершенных бо есть еже пребыти на трапезе и не победитися чревом. Вы же праздни есте, яко не вразумистеся в словеса отцев, глаголющих: да не речеши, чесо ради сие? Но себе вонми. Иже паки увещавают не оклеветати кого: исполняюще пророческое слово. «Яко да не возглаголют уста моя дел человеческих» (Пс. 16, 4). И впадосте во изречение глаголющее: «злый человек от злаго сокровища своего износит злая» (Мф. 12, 35). Почто паче не помыслисте о братиях онех благая в назидание, яко мы нерадим, а братия наши воздержатся? Якоже тии востающии братия благая помышляют о вас, глаголюще: увы нам! яко от немощи востаем, братия же наши, аще и больше нас ядят, не вредятся. Вся бо с разсуждением творят. И в сем, тии убо избегают прещения онаго глаголюща: «не судите, да не судими будете» (Мф. 7, 1). Вы же впадаете в не, осуждающе братий ваших, сущих превыше вас: преступающе слово апостола глаголющее: «ядый не ядущаго да не укоряет» (Рим. 14, 3). Паче же, должни есте сами, причащающеся больше онех, печалитися убо, яко побеждени чревом: благодарити же Богови о причастии. И может вас благодарением сим свободити от брани чрева, и осуждения, еже на братию. Аще же хощете уразумети, то в разсуждение приходят дела, еже разсудити благое от злаго, по апостолу глаголющему: «вся искушайте, доброе держите» (1 Фес. 5, 20). Разсуждение убо аввы сие дело есть, кроме всякаго противословия.