Аскетика. Том I - авва Дорофей

Вопрос 502. Брат, подвизаемь удобно на гнев, вопроси тогожде старца о сем.

Ответ Иоанна. Аще бы нудился еси еже умрети от всякаго человека и восприяти мало терпения, то имел бы еси почити и свободитися от многих бед. Да смирится сердце твое пред Богом: и благодать Его со заступит нас во всех.

Вопрос 503. Брат вопроси великаго старца, глаголя: помолися о мне, отче, яко немоществую душею и телом, да укрепит мя Господь, во еже благодарим Ему. И о брате сущем со мною, яко и той требует милости.

Ответ Варсануфия. Господь да утвердит тя во всяко дело благо, якоже просил еси. Се и сие дело есть благо, еже помощи сущему с тобою брату по силе. И рекий: «огня приидох во врещи на землю» (Лк. 12, 49), да ввержет его в сердце твое и мое. И да вижду тя растуща, яко кедры оны ливанския, и цветуща, яко финик в раи Божии. Ибо сим тако сущим, и аз вкушаю благих твоих, и веселюся, о Христе Иисусе Господе нашем, Емуже слава вовеки. Аминь.

Вопрос 504. Отче, помолися о мне. И молю уразумети, откуду таковое неможение случается, и в службе моей, и в рукоделии моем. И от пренемогания, во еже ясти и спати преклоняется помысл.

Ответ. О молитве: аще негли имам молитву, не могу помолитися о души моей паче, нежели о твоей: трепещу бо Глаголюща: «Взыщи ближняго твоего, яко сам себе» (Мф. 22, 39). Но аз прежде творю силу мою, Бога же есть милость, иже сотвори с нами уже велию милость и творит. Не отрицаюся, яко сотвори: понеже неблагодарность обрящется. О неможении же: еже единою быти тако, и единою тако, то путь сей тако есть. Ходит кто путем гладким, и паки обретает стремнины, и горы, и приходит паки на правый путь. Но понеже глаголет: «о всем благодарите» (1 Фес. 5, 18), то должни есмы. И о еже ясти и нити, и спати: да предваряет благодарение. Поучися в слове апостольском, яко «аще ясте, аще ли пиете, аще ли ино что творите» (1 Кор. 10, 31): и сохрани оно во всем, и сохранит тя Бог благодарения. Тому слава вовеки, аминь.

505. Тогожде великаго старца к томужде вопросившу, аще подобает употребляти врачбу?

Ответ. Брате, употребляющии врачев и не употребляющии, в надежде Божии употребляют, глаголюще: о имени Господни вверяем себе врачем, яко подаст ими исцеление. И не употребляющии, в надежде имени Его не употребляют, и врачует их. Аще убо употребиши, не согрешил еси, и аще не употребиши, не высокомудрствуй. Сие же да увеси, яко, аще и врачев употребиши, воля Божия бывает, и ничтоже ино. Аще ли же хощеши, то слово (святаго) Илии удержи, еже глаголаше, и будеши в сей день без попечения.

Вопрос 506. Помолися о мне, отче, и рцы ми: что есть, яко нощию, егда хощу пети, то леность ощущаю: и наипаче, егда бывает хладно? И прочее, много нощей седя пою и молюся. Понеже убо боюся, не от разленения ли сия стражду, сподоби мя отче, просвети мя и помолися, да сотворю что-либо аще возглаголеши мне?

Ответ. Еже за друг друга молитися, всем заповедано есть. А о нихже вопросил еси, уразумети хотя, что есть: то есть часть смешана от семене бесовскаго, и часть от немощи телесныя. Темже убо еже пети, или молитися седящу ти со умилением, не возбраняет еже благоугодной быти Богови службе твоей. Аще бо и стоя сотворит сию кто с парением, то ни во чтоже вменяется труд его. Господь да поможет ти, брате. Аминь.

Вопрос 507. Молю святыню твою, отче: понеже немощен есмь душею и телом, имам же довольныя дни телом наипаче боля, якоже во утриих пищу приимати; многажды же и в корыте купальном лежу. И есть, егда благодарит душа моя, глоголющи: яко Бог попусти мне болезнь сию за многая согрешения моя. Иногда же скорблю, глаголя с пренемоганием: яко несмь достоин, якоже вси, ясти хлеб мой единою днем с покоем. И паки глаголет ми помысл: еда достоит противуглаголати Богови? Не весть ли вся? Еда без Него может что быти? Претерпи со благодарением. Молю тя, отче, щедротами Божиими, помолися о мне и яви мне, како должен есмь преити, да не от печали пожерт буду.

Ответ. Святыня твоя святыни моей написа помолитися о боголюбии твоем. И аз же неразумный отец молю тя разумнаго сына тожде сотворити, и помолитися о мне, иждивающем дни своя в суете. Ты убо глаголеши, яко поне единою благодариши Богови: аз же николиже. Но понеже не могу премолчати, якоже непщую, глаголю: яко, аще не за сласть яст кто, но за немощь телесную, то Бог не осуждает его. Пресыщения бо ради и ради взыграний плотских возбраняема бывают брашна: А идже предлежит немощь, тамо предлежит упразднение действия их. Идеже бо немощь, тамо призывание Бога. Разсуждаю убо, яко еже дати требование телу, но истине нужда есть, и еже благодарити в немощи не осуждает человека. Не истязует бо Бог человека паче силы. Якоже имеях, глаголах. Не глаголю отнюд, яко истину глаголю: но то, еже имеяше сердце мое, изъявих. Прочее, искуси и ты, и обрящеши полезное. И прости мя, никогдаже могущаго умолчати.

508. Тойжде боля, и не могий стоя сотворити службу свою, ниже единою ясти, моли тогожде великаго старца помолитися о нем и явити ему о сем.

Ответ. Егда имеяху евреи свободитися от работы египетския, тесноту и скорбь велику терпеша, между морем и варварскими руками. И по онех знамениих и чудесех, яже видеша очи их бывшая во египтянех, и во всей стране их, забыша Бога сотворшаго сия, и приближишася до отчаяния спасения, зряще фараона и всю силу его хотящих напасти на них. Един же точию Моисей оста в них ко всесильному Богу. И понеже близ Господь всем призывающим Его во истине, зовущу от сердца Моисею, и всей двери молчания належащей о устнах его, отвеща Сердцеведец: «Что вопиеши ко Мне? Удари жезлом, иже в руце твоей, море, и расторгнется, и внидут людие, и прославлюся в фараоне, и во всей силе его» (Исх. 14, 15, 16). Тако и зде. Есть болезнь, и есть запинание от бесов. Прочее, скорби и смущение помыслов. Ослабевает прочее тело от болезни, запинается от тяжести бесов. Аще ли же молча возопиет Моисей, си есть, аще бодрствуя воззовет ум, аще седя, аще возлежа, то, слышит его Слушаяй тайная сердца, и исполняется слово оно: «яко, аз сплю, а сердце мое бдит» (Песн. 5, 2). И запрещает морю, глаголя: сотвори путь людем моим. И тогда погрузится фараон со всеми своими, и тишину приимут людие, праздник сотворити Богови. Аще убо стоиши, аще ли седиши, аще возлежиши, да бдит сердце твое совершати службу псалмов твоих. Уклоняйся в молитву, припадая Богови непрестанно, или днем, или нощию. И тогда отыдут постыждени врази, борющии душу. А о еже второе приимати пищу: честен да будет устав пищи твоея и со страхом Божиим. И да не усумнишися, не осудишися бо. Сие же есть еже не прияти по похотению ничесоже, но, аще что обретаеши яко естество приемлет: и еже пребыти алчну и не насыщену по ястии. Молю же помолитися о мне, яко да благодушно и с веселием шествую простертый предо мною путь, равный оный и углажденный и полный мира и радости и веселия, света же и радования, егоже насытитися не мощно есть и егоже кроме инаго несть.

Вопрос 509. Тойжде, облегчен быв от болезни, вопроси тогожде великаго старца: отче, егда причащаюся пищи, зело отягощаюся, и паки не могу поститися. Изнемогает же тело мое, и поты мне бывают. И жестосердие же и гордыня отгоняют от мене слезы.

Ответ. Брате, целую тя о Господе, моляся Ему укрепити любовь твою и дати тебе терпение. Да уразумееши же, яко брань есть бесовская, отягощающая тя в снедех, яко да ввержет тя в разслабление. И со мною бо много время брань творяше, и отягощаше мя зело, и творяше мя блевати всякия нощи: и начах приимати мало, и премени брань тую. И якоже начинах ясти, егда влагах частицу во уста моя, творяше мя изблевати. И творях по два варения, яко да угодно мне будет ястие, но и то ухищрение его бе. Благодатию же Христовою, терпением и благодарением, преста от мене. Бех же бессилен паче же рещи, и не подавахся, но понуждахся, дондеже укрепи мя Господь. Аз убо, брате, немощен сый, сия творях. Ты же множае внимаеши себе, и Бог пребывает с тобою. Никтоже бо есть завидяй тебе, точно един, егоже да упразднит Господь. А о посте, подклони выю твою долу, поминая жития отцев, и бдения, и смирися сердцем. И аще можеши, до девятаго потерпи. Аще ли же ни то, не пецыся: потщися же сохранити пост внутренняго человека, храня заповедь, еже не снести от древа, и внимати себе от инех страстей. И приятен будет сей пост внутренняго человека Богови: и покрыет тя за телесный пост. О слезах же рекл еси, яко жестосердие и гордость отгоняют я от тебе. Истреби тыя, и тогда приидут слезы, содействующим святым. От стужи страждеши потение: согрей себе мало, и поможет тебе Бог. И помолися о мне, яко разслабление мое во многая злая низводит мя. Но обаче не отчаяваюся, Бога имея милостива.

510. Тойжде в страсть впад, и не терпя болезни, проси тогожде великаго старца о молитве и помощи.

Ответ. Брате мой и любимиче о Господе. Извещения ради духовныя к тебе о Христе любве, открываю тебе тайны Божия. Веси бо, и уверен еси, яко молю Бога день и нощь, да спасет нас от лукаваго во Царствие Свое вечное. И якоже прихожду по обычаю, молити Бога о тебе, рече ми: остави мя искусити его на пользу души его, и телесною страстию да познает, что есть терпение его и что имать наследити молении и болезньми. И рех: убо, Владыко, с милостию яко сына, а не яко прелюбодейчища. И не бе потреба явити сия. Но да уразумееши радость оную уготованную ти, явих тебе. Да не возпечалуеши убо: милость творит с тобою Бог. Аще ли же сумнишися, то положи долу выю твою, ведый, что претерпеша святии мученицы. И приими елей от рож (глаголемый гречески родинон) со освящением. И Бог наш Своим хотением сотворит с тобою милость Свою, якоже хощет. Не сладце имам болети тебе чим, или душею, или телом. Бог да помилует тя. Помолися о мне.