Аскетика. Том I - авва Дорофей

Вопрос 457. Кто есть тщеславный? И кто есть гордый? И како приходит кто в гордыню?

Ответ. От еже хотети кому человекоугодия, приходит в тщеславие. Умножающуся же тому, приходит гордыня. Прости, брате, и молися о нас.

Вопрос 458. Брат вопроси великаго старца: рцы ми, отче, аще умиление, еже мнюся имети, истинно есть? И должен ли есмь зде на едине пребывати? И помолися о мне, яко стужение имею от телесныя брани.

Ответ. Брате, нынешний плач и умиление несть истинно, но отходит и приходит. Истинный бо плач, еже со умилением раб бывает человеку, неразлучно подчинен, и имущаго его брань не одолевает. Но и первая прегрешения изглаждает, и омывает скверны: и выну именем Божиим хранит человека, стяжавшаго его. И изгонит смех, и парение, и держит плач непрестанный: щит бо есть отвращаяй вся разжженныя стрелы диаволя. Имеяй его не уязвляется от брани отнюд, аще и с человеки будет, аще и с женами блудницами, с нами есть и брань творит. Знамение убо немощи и доблести показах тебе. И да не вознепщуеши, яко не можаше Бог облегчити от тебе брань ону: можаше бо, паче же молящихся ради о тебе святых. Но любя тебе, хощет ти браньми и обучении многими наказану быти, да приидеши в меры успеяния. Не приидеши же в сия, аще не сохраниши вся заповеданная тебе моими слогами, — тщеславнаго учителя. А о еже быти на едине, сие достаточныя крепости есть. И когда приидет тебе, сам от себе послю и глаголю ти: делай, чадо, еще, яко же рех ти, и верую, яко преуспети имаши о Христе. Не бойся, буди Господь с тобою. Аминь.

459. Тогожде ко иному старцу. Молю тя, господине авво, да помолишися о мне, яко да даст мне Господь малое терпение. И понеже глаголют отцы, яко аще не отсечет кто кореня страсти, паки временем впадает в ню. Како отсецает кто корень страсти и чревобесия и сребролюбия? И понеже рече мне великий старец, яко нынешний плач не есть истинен, но отходит и приходит: от коего устроения приходит мне сие? И, должен ли есмь понудити себе в сие, или оставити, дондеже приидет истинное умиление?

Ответ. Брате, дает нам Бог смирение, и отреваем е. И паки глаголем: помолися, да подаст нам Бог смирение. Смирение есть, еже отсещи во всех волю свою и без попечения быти от всех. А о еже отсещи корень, якоже рекл еси страстей онех, за еже отсещи волю и огорчити себе, елико вместно, и мучити чувствила, да сохраняют чин свой, во еже не употребляти зле, сим пресецается корень не точию сих, но и прочиих. А еже отходити от тебе и приходити нынешнему плачу не истинному, за еже разслабитися единократно помыслу, и разгоретися, бывает. Егда убо пребудет теплота, бывает великое и постоянное умиление, и сему последует истинный плач, о немже должен еси пещися, понуждая себе, да приидет ти. Брате, да не вознерадиши сохранити словеса и заповеди старцевы, и спасешися. Суеслових ти и аз, брате, но не от делания, ниже от Духа. Верую же, яко елика ти глагола старец, и глаголет, от делания прежняго глаголет и от Духа Свята есть. Обаче совесть свидетельствует мне, яко не хощу тя прельстити отнюд ни в едином деле. Сего ради верую, яко ниже словеса моя вредят тя, ниже советования моя. Весть бо, яко не хощу, но вместо души твоея всяко вопрошающу ти и хотящу спастися хощу быти, аще укрепит мя Господь. «Да даст ти Бог помощь от Сиона, и узриши благая Иерусалима вся дни живота твоего» (Пс. 127, 6). Помолися о мне, брате.

Вопрос 460. Христолюбец некий вопроси тогожде старца: должно ли любопытствовати, яже о Божественных Тайнах? И приступая к ним грешный, яко недостоин, осуждается ли?

Ответ. Входя во Святая, вонми, приемля Тело и Кровь Христову, имети несумненно, яко истина есть. А еже, како? Не любопытствуй, по реченному: «Приимите ядите, сие бо есть Тело Мое и Кровь». И сия даде нам во оставление грехов (Мф. 26, 26). Веруяй тако, надеемся, яко не осудится, а не веруяй, уже имать осуждение. Да не убо, яко грешна, осуждая себе, возбраниши приступити: но имея яко приступаяй ко Спасу грешник, сподобляется отпущения грехов. Якоже в Писании обретаем приступльшия к Нему с верою и слышавшия Божественный оный глас, яко «отпущаются тебе греси твои мнози» (Лк. 7, 47). Убо аще бы достоин был приступити к Нему, грехов не бы имел. Но понеже грешник бе и должник, приял есть прощение долгов. И Самаго Господа услыши, глаголюща: «не приидох спасти праведных, но грешныя» (Лк. 5, 32). И паки: «не требуют здравии врача, но болящии» (Мф. 9, 12). Имей убо себе грешна и боляща и приступи к Могущему спасти погибшаго.

461. Тогожде подобне. Владыко, како допусти Владыка наш Спаситель Христос Иуде, предателю сущу, причаститися тайныя вечери? Святый бо Иоанн Златоуст в толковании на Матфея, глаголет: подобает недостойнаго возбранити страшныя таинственныя трапезы. И святый же Павел (1 Кор. 11, 29) суду таковаго повинна быти определяет: еже не попускает кому сведущему в себе согрешения, дерзнути когда честней оней и страшней приступити тайне, и, яже оттуду, жизни причаститися. Что убо леть есть сотворити? Зело бо мя, грешна суща, сия вещь смущает.

Ответ. Да покажет Бог велие Свое человеколюбие, и яко терпит человеку до последняго издыхания, якоже покаятися и живу быти ему. Сего ради и ноги ему умы, и таинств допусти причаститися, да отымет от него всякое отвещание и от глаголющих присно, яко аще бы допустил был его насладитися сих, то не бы погибл был: и самоосужден бысть. И исполнися на нем, еже апостол глаголет: «Аще ли же неверный отлучается, да разлучится» (1 Кор. 7, 15). И о грешницех и не кающихся — тожде. А еже возбранити им, по святому Иоанну, наставление бяше, прещением суда и муки: не бо рече отринути их, ниже отсещи от Церкве. Ниже Иисус таково сотвори Иуде. Аще ли же пребудут в техжде, и со безстудием приступают, самоосуждени бывают, отлучающе себе славы Божия. Но аще приступают Святым Тайнам грешницы, аки уязвлени, и просяще милости, сих врачует Господь и достойны творит Своих Таинств, рекий: «не приидох призвати праведники, но грешники на покаяние» (Мк. 2, 17); и паки: «не требуют здравии врача, но болящии» (Мк. 2, 17). Паки же глаголю, еже глаголаше святый Иоанн, возбранити согрешающия от Святых Тайн — есть, еже заствидетельствовати им осуждение. Ибо «ядый и пияй недостойне, суд себе яст и пиет» (1 Кор. 11, 29). И таковый извержен есть от Церкви Божия. Ниже бо приял есть, точно осуждение. Сего бо ради и рече не отсещи, да сами себе изнесут изречение. И никтоже должен рещи себе достойна причащения, но яко недостоин есмь, и верую, яко освящаюся причащаяся. И бывает ему тако, по вере его, Господем нашим Иисус Христом. Емуже слава вовеки. Аминь.

Вопрос 462. Еже рещи Иуде: согреших, предав кровь неповинную, (Мф. 27, 4) и еже поврещи сребреники (Мф. 5, 24), не мнится ли покаяния быти дело?

Ответ. Тогда бы покаяние было Иудино, аще бы Господу покаялся. Глаголет бо: «шед прежде смирися с братом твоим» (Мф. 5, 24), емуже согрешил еси, а не иному. Он же и горше сотвори. Отшед же погуби себе отчаянием. И сего ради прият не бысть.

Вопрос 463. Владыко, рцы ми: что есть воля Божия? И что есть попущение? И кая суть из обою действия окончательная?

Ответ. Егда приидет тебе вещь печальна, испытай, зазирает ли тебе помысл в чем о вещи той? И аще не обрящеши, то ко искусу прииде тебе тая вещь. И сие то есть по воли Божией. Аще же обрящеши, то сие есть по попущению к наказанию. Обаче и обоя полезна суть человеку.

Вопрос 464. Понеже добре есть, яко научисте, оставляти Богови волю, еже хранит человеку несмущенность. Подобен же мне немощный, аще увидит вещь, хотящую погибнути, то или смущается, или долготерпя раскаевается, аки сам погубив вещь ону долготерпением. Кое есть лучшее? И како должно приити во исправление? И что подобает помышляти, да избежит кто смущения?

Ответ. Рече Господь: «Радуйтеся, егда во искушения впадаете различна» (Иак. 1, 2). От различных убо онех искушений есть и сие, о немже должен радоватися человек. Аще ли же будет немощен, и не могий подолготерпети, радуяся о погибели вещи, и повергая воли Божией, то брань творити должен первее на смущение, глаголя себя самому: вонми, да не смутишися. И аще будет воля Божия, еже сохранней быти вещи той, будет сохранена. И что ни случится ей, приимет благодарно: ни едино бо благо тщанием нашим исправляется, но силою и волею Божиею. И обаче истязует, от нас Бог, тщания еже по Богу, а не по некоей хитрости или лжи. Сия бо суть лукаваго.

Вопрос 465. Егда привпадают многии помысли сквернии, и стыждуся сказати кому (нечто) от них, что сотворю?

Ответ. Рцы Богови: Владыко, прости ми, аще чрез волю Твою помыслих в разуме, или в неразумии. Яко твоя есть милость, вовеки. Аминь.

Вопрос 466. Добрая повествования от писания и жития отец, еда добро есть всегда повествовати, или ни?

Ответ. Яко сладок есть мед, разумно есть всем. И яко Приточник рече: «мед обрет яждь умеренно, да не како пресыщен изблюеши» (Притч. 25, 16), и сие не есть неизвестно. Суть бо меси и меси, есть мех, еже вмещает един спуд, а другий вмещает три. Аще убо восхощет кто понудити той, иже есть единаго спуда, вместити меру триех спудов: не может прияти. Тако и зде, не можем равными сотворити вся человеки. Ибо ов убо может без вреда побеседовати, ов же не может. Добро убо и дивно молчание паче всех. И тое почитаху отцы и лобызаху, и в нем прославишася. Показуя бо доброту его Иов, и еже от беседы осуждение, глаголаше: «возложу перст на уста» (Иов. 39, 34). И иже пред сим патриарх Авраам, по беседе добрых онех прошений, рече: «яко аз есмь земля и пепел, еще единою приложу и возглаголю пред Господем» (Быт. 18, 27), показуя, еже по сих, тщание. Но понеже мы за нашу немощь не достигохом, еже путем совершенных ходити, да глаголем пользующая к назиданию от глаголов отеческих, и да не влагаем себе в повествования Писаний. Ибо бедство имать вещь неведущему: духовне бо речена суть. И плотян духовная разсудити не может. Глаголет бо: «писмя убивает, а дух животворит» (2 Кор. 3, 6). Да бежим убо во глаголы отеческия, и обрящем сущую в них пользу. И сие же сокращенно, поминающе рекшего: «от многословия не избежиши греха» (Притч. 10, 19). Аще и речет помысл: добра суть словеса, или повествования, то да воспомянем, яко несмы делатели глаголемых от нас, а непщуем, яко и иныя назидаем, сия глаголюще: осуждение же приемлем паче, не суще тех делателе. Но не за сие возбраняем, яже по Богу, в них беседу: лучше бо в тех беседовати, нежели во инех безместных, но да не впадем в высокомудрие, или хваления помысл, должни имети, якоже и есть, яко, не содеявше глаголемая нами, на осуждение глаголем сия. И о сих, якоже и о инех погрешностех, помолимся Богу, глаголюще: да не осудиши мя, глаголавша сия.