Аскетика. Том I - авва Дорофей

Вопрос 452, тогожде. Некто иногда моляше некоего от отцев вкусити у него, он же отречеся, аки не могий. Ин же некто умоли его точию сотворити молитву в келлии своей, и яко вниде, принуди его остатися вкусити, и многою нуждею убежден быв оста. Познав же иже из начала его моливый, зело опечалися: убо по Богу ли есть сия печаль?

Ответ. Егда виною аки бы благословнаго дела и душеполезнаго смущается кто и печалует и гневается на ближняго своего, явлено бывает, яко несть сие по Богу. Вся бо, яже суть Божия, мирна суть и полезна, и во смирение ведуща человека, и во еже самаго себе осуждати, Глаголет бо: яко, праведный в первословии себе самаго оглаголник (Притч. 18, 17) бывает. Мняйся бо яко хощет нечто по Богу, и возбраняемь от некоего, таже осуждаяй возбранившаго, и оклеветаяй того, от сего является, яко неимеяше предложения своего по Богу: глаголет бо: «от плод их познаете их» (Мф. 7, 16). Имеяй бо предложение свое по Богу, и возбраняемь, смиряется паче, и мнит себе недостойна, и аки пророка имать возбранившаго его: зане аки провидя недостоинство его, возбрани ему. Аще убо по любви Божией позовеши кого приити в келлию твою, или и воспросиши прияти от кого нечто аки по вере, и не соизволит дати тебе: ин же некто вопросит у него, и соизволит дати, да не попустиши бесу гневному смутити сердце твое, всякое бо дело, имущо смущение, от Бога несть: но паче смирися, глаголя: яко аз недостоин обретохся, и отцем явил есть Бог грехи моя и недостоинство. И даст благодать даяй смиренным. Имеяй бо смирение, не всегда хощет яже о нем, но присно низу течет во смирение. И помысли сотника онаго приступлшаго ко Иисусу о отроце своем и услышавшаго: «Аз пришед исцелю его», текуща во смирение и глаголюща: «Владыко, несмь достоин, да под кров мой внидеши» (Мф. 8, 7, 8). Кто ни восхитил бы сего? Но смирение ниже сего взыска, осуждая себе за недостойна. А сердцеведец Бог, приемляй предложение человеков, похвали веру его, глаголя: «яко ни во всем Израили толики веры обретох» (Мф. 8, 10). И похвалу ему исходатайствовало велию смирение оно, и здравие отроку его подало. И многая суть дарования подаваемая смирению. Тецем в не, да благодать его приимем и похвалу от Иисуса Христа, смирившаго Себе и послушлива бывша даже до смерти, и давшаго нам образ смирения. Тому слава вовеки. Аминь.

Вопрос 453. Понеже убо, отче, сотник превосходящаго онаго смирения употребив, недостойна себе суди пришествия Владычня, и похвалена бысть вера его. Авраам же и убеди, и припаде якоже бы внити ему в кинию, аще и яко человеку приступи, не ведая, яко Владыка бяше. Еда не имеяше смирения Авраам? Но больша ли есть паче патриарховы добродетель сотника? Смирение бо (яко же присно учите) первенство имать добродетелей. Рцы убо мне силу, и различие добродетелей обоих: яко, ов убо не приял есть пришествия, и похвален бысть: ов же зело сие с любовью приял есть, и похвален бысть?

Ответ. Оба тии совершенни бяху верою, яже к Богу. И по приличности времени употребиша веру и смирение. Ибо рече и патриарх Авраам: яко, аз есмь земля и пепел (Быт. 18, 27). И еже вменяти себе тако, показует, яко ниже странноприимства достойна себе вменяше. Но обаче, понеже совершен бяше, всякаго человека приемляше, не разсуждая грешных от святых. О нем бо то речено бысть, и о Лоте: яко «страннолюбия не забывайте: Тем бо не ведяще нецыи, странно прияша Ангелы» (Евр. 13, 2). Аще убо уразумел бы Авраам, яко Владыка есть, то употребити имеяше гласа сотнича. Паче бо вменяющаго себе землю и пепел, ничтоже смиреньше обретаем. И сотник же в приличествующее время употреби смирение, познав Его быти Спаса. Мы же глаголем: яко и дело страннолюбия имеяше: не бо без дел вера его бяше, ниже похваляше Христос праздну веру, сиречь и дела имеяше вера его: и во время странноприимства, употребил бы и той усерднейшаго прошения патриарха Авраама ко всем. Обоих убо совершенных обретаем.

Вопрос 454. Понеже убо аз грешен есмь, ниже смирения имый истиннаго и искренняго егоже ради похвален бысть сотник: ниже страннолюбия любве, еяже ради Авраам Бога угостити сподобися: что должен есмь сотворите? Еда должен есмь, взирая на мое недостоинство, отрицатися святых пришествия, и еже из него отщетеватися приобретения? Или паче притекати не образом страннолюбия, но яко немощен душою и еже от них врачества требуя? Свойственно бо есть немощным, еже искати прилежно врачев пришествия, и не вменяется им сие в страннолюбие. Аще и не призовут их, не мнятся смиренномудрия добродетель имети, но паче безумия. Научи мя убо, отче, должен ли есмь убеждати, яко требуяй, или отрицатися, яко недостоин?

Ответ. Убеждай, яко боляй и требуяй врача: сие же разумей: яко отроча раждаемое не абие бывает в мужа совершенна, но проходит сквозе пищи мягкия, и тогда приходит на твердую пищу. Совершенных бо есть твердая пища. Сего ради и апостол рече: млеком вы напоих, а не брашном (1 Кор. 3, 2). Странноприемлюще убо, да не речем, яко заповедь исполняем: но требующе врачев, якоже болящии. И пребуди в сих, дондеже введет тя Бог в совершенная.

Вопрос 455. Что есть дерзновение и смех нелепотный?

Ответ. Есть дерзновение, и дерзновение. Есть дерзновение от безстудства. И сие есть родительница всех зол. И есть дерзновение от веселости. И сие убо не всяко пользует употребляющего е. Но понеже крепких и сильных есть еже избежати обою: аще не можем мы за немощь нашу обою избежати, то ноне удержим дерзновение веселости, внемлюще, еже бы от сего не подати претыкание брату в соблазн. Сущии бо с человеки, аще не будут совершени, избавитися втораго сего дерзновения не могут. Аще убо не можем, то да будет нам в назидание, а не в соблазн; наипаче, егда потщимся сократити и с сим сопряженную беседу: ибо не весьма пользует многословие, аще и не мнится имети нечто безместно. О смехе же туюжде имате силу: отрасль бо есть дерзновения. Аще убо имать кто дерзновение сквернословия, яве есть, яко и смех имать скверну; аще ли же дерзновение веселости, от сего яве есть, яко и смех имать веселый. И якоже речено есть о дерзновении, яко не пользует еже имети е, тако и во смехе его не должно закосневати, ниже разлиятися, но востягати помысл, еже бы с честностию проити смех той. Ибо разливающиися в него, да разумеют, яко и в блуд впадают вси.

Вопрос 456. Молю тя, отче, да речеши ми: какова есть подобающая веселость? И како подобает грешнику тоя употребляти, во еже не превзыти своя меры?

Ответ. Совершеннии убо, совершенно внимают себе, якоже художник ведущий совершенно художество свое. Аще бо случится ему беседу творити к некиим егда делает, не удерживает его онех беседа еже сочинити потребная художеству: но присно убо беседует с сущими у него, ум же его всецело в предлежащее художество клонится. Тако должен есть беседуяй с некиими, весело убо показовати лице и слово, имети же помысл внутрьуду воздыхающ. Ибо о сем писано есть: и воздыхание сердца моего пред Тобою есть выну. И якоже художник не искусный, аще делая беседует, бедствует погубити художество свое: тако и употребляяй веселость. Требует убо таковый великаго утверждения внимати своим словесем и веселости лица, да не како изыдет всесовершенно из пути плача. Таковый убо хотя беседу творити, должен есть вопрошати помысла, како подобает творити? И тако уготовити себе. Писано бо есть: «уготовихся, и не смутихся» (Пс. 118, 60). А еже уготовити себе, сие есть: еже рассуждати лица, за какую причину хотят с нами беседовати: и по намерению приходящаго, уготовити помысл во страсе Божии. Аще убо приветствования ради бывает беседа, да употребит сея с приятностию в подобающих ей словах. Аще ли же отцев есть приятие, то да бывает со радостию по Аврааму, умывшему ноги Владыки и Ангелов и приемшему их с молительными словесы. Явление бо веселости в коемждо показует нам благовременство вещей. Егда бо случайно убеждаем приходящих во еже прияти что, или снедно, или питейно, с веселостью сие да сотворим, сокращающе же тую за смущение помысла.

Вопрос 457. Кто есть тщеславный? И кто есть гордый? И како приходит кто в гордыню?

Ответ. От еже хотети кому человекоугодия, приходит в тщеславие. Умножающуся же тому, приходит гордыня. Прости, брате, и молися о нас.

Вопрос 458. Брат вопроси великаго старца: рцы ми, отче, аще умиление, еже мнюся имети, истинно есть? И должен ли есмь зде на едине пребывати? И помолися о мне, яко стужение имею от телесныя брани.

Ответ. Брате, нынешний плач и умиление несть истинно, но отходит и приходит. Истинный бо плач, еже со умилением раб бывает человеку, неразлучно подчинен, и имущаго его брань не одолевает. Но и первая прегрешения изглаждает, и омывает скверны: и выну именем Божиим хранит человека, стяжавшаго его. И изгонит смех, и парение, и держит плач непрестанный: щит бо есть отвращаяй вся разжженныя стрелы диаволя. Имеяй его не уязвляется от брани отнюд, аще и с человеки будет, аще и с женами блудницами, с нами есть и брань творит. Знамение убо немощи и доблести показах тебе. И да не вознепщуеши, яко не можаше Бог облегчити от тебе брань ону: можаше бо, паче же молящихся ради о тебе святых. Но любя тебе, хощет ти браньми и обучении многими наказану быти, да приидеши в меры успеяния. Не приидеши же в сия, аще не сохраниши вся заповеданная тебе моими слогами, — тщеславнаго учителя. А о еже быти на едине, сие достаточныя крепости есть. И когда приидет тебе, сам от себе послю и глаголю ти: делай, чадо, еще, яко же рех ти, и верую, яко преуспети имаши о Христе. Не бойся, буди Господь с тобою. Аминь.