Скифская история. Издание и исследование А. П. Богданова - Андрей Иванович Лызлов

По сем поидоша на Дунай и взяша пять градов, их же мало пред сим времянем поставил Матфей, краль венгерский, обороны ради государства своего, пять тысящь воинов посадив в них. От них же турки четыре приступами взяли, а пятый чрез подданство[1792]. Ибо сам Махомет султан со множайшим воинством стояше блиско, назирающи || (л. 245 об.) повождения военнаго оному своему воинству[1793].

Лета 6986‑го паки турки многим воинством тую же Коринфскую область зелно воевали и всюду самым италианом и венетианом тесно от них бяше. К тому и междоусобныя свары много им тщеты творяху, турком же нечестивым дрезновения примножаху[1794].

И до таковаго безумия от гнева венетиане приидоша, яко постопиша турскому султану во Албанской стране град Скутáрь того ради, дабы в покое их оставил и не чинил им препятия междоусобства не глаголю усмиряти, но множае устрояти.

Той же Махомет султан в есени лета 6987‑го посла сто пятдесят тысящ турков, к тому мултян, помощников своих, в землю Седмиградскую, область государства Венгерскаго. Иже пришедше положишася обозом под градом Соби́новым[1795].

О чем уведавши, венгерстии властели собрашася с воинством и на три полки воеводами разделившися, изыдоша обраняти Отечества своего от турков.

И по случаю некоему безвестно нападоша турки || (л. 246) на един от полков тех, над ним же бе воевода Стефан названный Батфорый[1796] [иже последи бысть кралем у поляков][1797]. Разсмотрев убо той, яко в тесных оных местех невозможно было ему от битвы уклонитися или с прочими двомя полками скораго ради[1798] случая совокупитися, всякой же даде ведомость им, сам потом воинству своему, словесы и клятвами утвержденному и умрети обещавшемуся, на брань повеле исход ити.

И тако возгореся презельная брань и пребысть чрез три часа. Потом турки множеством одолевати начаша венгерское воинство, их же воздержаваше Стефан воевода, предлагающи им недавное обещание и оных своих дву полков скорое прибытие извещая[1799].

И наведе потом воинства часть збоку турком, от чего турки в боязнь впадши уступати начаша и потом вдашася невозвратному бегству. И тако венгры[1800] победу восприяша и пятьдесят мужей турков плениша. Обаче не без тщеты своея победу стяжаша, ибо мнози[1801] знаменитые от венгров падоша; тогда и сам Стефан воевода уязвлен бысть.

Всяко же, аще и многия знаменитыя победы сотворяху христиане над турки, обаче множественнее сами побеждаеми бываху. И не точию села и грады, но и самыя страны и целыя области прихождаху под державу им, паче же при сем нечестивом Махомете султане, иже зело желаше пролития крове и смерти верных Божиих. Совещавшися бо и клятвами утвердившися с пашами своими до конца имя христианское истребити, един сам хотящи всего света обладателем быти, не хотящи никого слышати обладателя или равнаго себе.

С московским же великим государем князем Иоанном Васильевичем дружбу хотящи имети, слышащи о великой славе его, и мужестве, и победах над окрестными супостаты, лет 6990‑го посла к нему послов своих о мире и любви с подарки немалыми.

Иных же не престаяше воевати. Ибо того же лет 6990‑го посла пашу своего Ахмета имянем во область Италийскую Апуллию названную, иже пришед тамо прият град названный Гидрунт и воинством своим укрепил его, дабы могл оттуду исходити войною на самыя Римския пределы[1802].

Другаго же пашу имянем Амéзу, грека прежде бывша, ко острову Родискому посла, хотя обладати им[1803]. Иже пришед под началный град острова того крепко добываше его, но ничтоже успев с великою тщетою и постыдением возвратися к султану[1804].

Иже сам тогда же с третием величайшим воинством изыде на солтана египетскаго[1805], хотящи его покорити. Но не сконча тщетнаго помысла своего, ибо идущи на Египет во граде Никополе душу свою изверже[1806].

Бяше сей наисчастливейший всех прежде себе бывших султанов; а то грех ради общенародства и несогласия христианских обладателей убо сей мучитель дванадесять царств или государств приоблада к государству, его же прият от предков своих.

Не всюду же убо бранию одолеваше, но множае клятвопреступлением во время обещаннаго покоя. И прият до двоюсот прекрепких твердынь, их же недобытными и неприступными мнеша быти христиане; но сего суровейшаго онагра никоя крепость возможе удержати || (л. 247 об.) и от всеядных челюстей его избыти.

Пребысть же убо сей на обладании у турков до взятия и по взятии Константинополском лет тридесят два[1807]. Последи себе оставил двух сынов, Баозита и Селима, его же неции Зизимом называли.

Баозит 2, 9-й султан турецкий

По смерти онаго несытаго анагра[1808], Махомета султана глаголю, мало нечто прилежащия к турком христианския страны покоя приобретоша, а то сицевым образом.

По смерти бо онаго два сына его, Баозит[1809] и Зизим или Селим[1810], хотящии кийждо от них един государством обладати[1811], войну между собою <простроша>[1812]. Такожде и[1813] воинство турское надвое разделишася: едини хотяху Баозита султана имети, другия меншаго брата его Селима[1814].

И в таковом несогласии битву злу между собою соделаша, идеже Селим с воинством своим побежден бысть от Баозита, || (л. 248) убежа к египетскому султану и от него помощь и надежду приимши, совокупив воинства, паки з братом си Баозитом брань состави, но и паки побежден бысть и едва смерти гонзнув на остров Родисский ко христианом, аще и противным си, убежа.

И оттуда от началника воев родисских послан бысть в Рим, его же на пути прият краль францужский[1815], и в пути том смертию от отравы скончася, повелением, яко пишет Кромер историк[1816], Инокентия Осмаго папы римскаго[1817].

Белский пишет[1818], яко и к папе довезен бысть и тамо отравою уморен. Но яковым убо образом ни скончася, брату же старейшему Баозиту кроме всякия препоны обладателства уступил.

Егда же таковым образом обрете Баозит покой во обладании своем, тогда лета 6992‑го собрався с великим воинством поиде землею и морем на Волоскую землю и на Бессарабию, хотящи мститися срамоты отца своего, юже подъят от Стефана воеводы волосскаго и под Белым градом от христианскаго || (л. 248 об.) же воинства.

Стефан же воевода, слышав таковая, во ужас впаде, и того ради, дабы приобрел помощь некую, поддадеся под державу краля полскаго Кази́мера и обещание в том верное ему учини[1819]. От него же приим в помощь три тысящи поляков, отъиде