Аскетика. Том I - авва Дорофей

Ответ Иоанна. Похвалим от души подавшаго, и похулим от души приемшаго, и носим ю со смирением осуждающе себе. И прочее сохранимся от лихоимства.

Вопрос 335, тогожде. Аще убо случится кому хотети подати ми вещь, и нуждаюся в ней; вижду же сердце мое, яко по страсти хотяще тую прияти; что сотворю? Прииму ли нужды ради, или отвергуся пристрастия ради.

Ответ Иоанна. Якоже о пищи, тако разумей о сем. Веси, яко требуем пищи на всяк день, и возбраняемся прияти ю со сладостию. Но аще благодаряще давшему ю Богу, и осуждающе себе, аки недостойных, приимем: Бог творит ю во освящение и благословение. Темже убо, егда требуеши вещи и спеется, благодари споспешившему Богу, осуждая себе, аки недостойна, и отреет Бог от тебе пристрастие. Тому бо вся возможна: не возможна же тому ничтоже. Тому слава вовеки. Аминь.

336. Ин вопроси тогожде старца. Понеже заповедь есть Господня, еже любити ближняго, якоже самаго себе, и срадоватися ему и спечаловати, яко своему уду: и еже видети его во убожестве, и презрети, творит любовь преступати, аще и яже на потребу точию кто имать, яко немощи и оному довлети. Рцы ми, отче, в чем показуется любовь?

Ответ Иоанна. Яже ко ближнему любовь, многими образы является: и не в подаянии точию едином. Якоже, слыши: аще пойдеши с ближним камо-либо, и обрящеши помысл свой хотящ почестися тебе паче того, и не хощеши паче, яко да равно тебе почтен будет: в сем не имаши его, яко сам себе. Апостол бо глаголет: «честию друг друга больше творяще» (Флп. 2, 3). Аще вещь снедну имаши и видиши помысл твой хотящ на едине снести ю, по похотению своему без потребы: в сем не имаши его, якоже сам себе. Аще имаши довлеющую потребу тебе точию единому, и не даси ему от нея: в сем не имаши его, яко себе. Ибо аще восхощем сим образом исполнити слово Писания, не станет с нами. Ибо не написа нам о едином точию человеце, но всяк человек ближний именуется. Како убо можеши во вся человеки исполнити сие, не имый всем подати? И паки еже хотети ближняго имети яко самаго себе, есть и сие. Аще приключится тщета некая быти, и видиши помысл твой услаждающся еже оному паче вящше тебе отщетитися: се и в сем не имаши его, яко сам себе. Паки, аще видиши того похваляема, и не срадуешися ему, яко и ты с ним не похвален был еси, и не помышляеши паче, яко похвала брата моего на мя восходит, уд бо ми есть: ниже в сем поискал еси возлюбити его, яко сам себе. И елико токовая. Паки, еже имети ближняго яко себе, сие есть: аще услышиши от отец путь Божий, и вопросит тя брат твой, да не по зависти удержиши пользу от него. Но ведый, яко брат ти есть, рцы ему, еже слышал еси, со страхом Божиим, и не имей себе, яко учителя: не пользует бо тя сие.

Вопрос 337. Добро ли есть имети любовь к сверстнику?

Ответ. Еже не зело любовь имети к некоему сверстнику, добро есть. Сицевый бо обычай не оставляет приити плачу. Ниже ко иному некоему отъемлющему от тебе плач, имей любовь, не пользует бо тя сие, но паче вредит. Никтоже бо может стяжати что благо, аще не со многим трудом. Накажи убо очеса своя, еже не вняти кому прилежно, и не исполниши сердце твое лютаго дерзновения, приносящаго в погибель вся плоды инока.

Вопрос 338, тогожде. Аще услышу о некоем, яко во брани обретается, или в болезни, и аки состражду ему, первее убо рцы ми: таковое сострадание еда ли от бесов есть, хотящих упразднити мя от моих грехов? Таже, должен ли бех помянути его в молитве? И како в большей беде и гресех больших есмь аз? Аще же и брат той просит о сем? Аще же и некоему от отец речет ми рещи? Еда ли нечто и страстнаго еже молитися о ближнем, обучает в любовь? Како разсуждаеши, отче?

Ответ Иоанна. Яко никтоже должен оставити своего мертвеца и отыти плакати инаго, явиша отцы юнейшим; совершенных бо есть, еже спострадати ближнему: юнейшу же — спострадати иному, ругание бесов есть. Несмысленно бо судит того, аки боляща и бедствующа, о себе имать аки добре творяща, но паче полезно есть без попечения быти от него. Аще и будет память онаго в сердце его, или от других услышит о нем, да речет: Бог да помилует и мене и его. От себе же да не речеши кому от старец помолитися о ком. Се бо есть употребляти своея власти. Аще ли же хощеши сего избежати, напомяни, яко онсица скорбит: и старец, слышав, всячески помолится о немоществующем духом. Аще же речет ти некто рещи старцеви, рцы слово заповеди ради: помолися, отче, о онсице. Аще ли же речет ти, помолися о мне, такожде заповеди ради рцы: Господи, прости нас: или, Боже, помози нам: или, покрый нас в вещи, и да не возмниши и сию быти власть. Вопросил бо еси, и слышал еси рещи. А еже спострадати кому, аки ради любве: не у пришел еси в меру сию. Аще стужает ти помысл о чем, тогда вопроси, и услышиши требование. Бог да помилует тя, брате!

Вопрос 339, тогожде. Рцы ми, отче, даже до куду должна быти мера любве брата к брату своему?

Ответ Иоанна. Брате, ина любы есть любы отеческая к чадом своим, и ина любы братняя к братиям своим. Мера любве духовных отец к чадом своим ничтоже имать вредно, ниже плотско: утверждени бо суть духовным мудрованием, и аще в слове, аще в деле, тщатся всегда пользовати юнейших по всему. И тако любяще, не умолчавают им недостатков их: но часто обличают, и наказуют, и утешают: добрый бо отец наказует чада своя. К ним бо речено бысть: обличи, запрети, умоли: якоже многажды творит тебе и авва твой, и не разумеееши, внегда обличает тя и запрещает и утешает тя. И понеже любве ради не умолчавает ти согрешения твоя, является, яко духовна есть любы его, яже к тебе. Кийждо же по мере своей любит ближняго своего. Мера убо совершенныя любве есть, еже по любви, юже имать кто к Богу, любити и ближняго своего, яко себе. Юность же должна есть хранити себе во всем. Вскоре бо запинает юнейшия диавол. Прежде убо в беседе начинают глаголати, аки о пользе души: негли же, ни тако. И по сем на иная прелагаются, в раздражение, в праздность, в смех, в клевету, и ина многа зла. Якоже исполнитися на них: яко наченше духом, ныне плотию скончаваете. Сия вся пострадаете туне. Тако бо приходят юнии в падение, от еже любити друг друга безсловесне, и собиратися особо во едино. Мера же любве их друг ко другу, сице должна есть быти: не клеветати друг на друга, ни ненавидети друг друга, ни уничижати, ни искати своих си, не любити ради доброты телесныя, или ради никоего телеснаго делания, не седети друг со другом, кроме великия нужды, за еже не власти в дерзновение погубляющее вся плоды инока, и оставляющее его, аки древо сухо. До зде есть мера любве юных друг ко другу, и да, якоже щадят себе от дерзости и празднословия, щадят и братию свою, трепещуще сести друг со другом безвременно, — яко да не уловлени будут в сих сетех, и уловят свою братию, боящеся глаголющаго: «горе напаяющему подруга своего развращением мутным» (Авв. 2, 15). И паки: «тлят обычаи благи беседы злы» (1 Кор. 15, 33). Внимай себе, брате.

Вопрос 340, тогожде. Что сотворю, яко стражду от скверных помыслов? И аще увем, яко и ин имать сия, присно глаголю: яко се и инии, якоже аз, помышляют злая. И паки не приходит ми плач, ниже умиление, и глаголет ми помысл: яко во елико есмь с человеки, не могу сих стяжати. Сотвори милость с немощию моею, и рцы ми, отче, како избавлюся от сих?

Ответ Иоанна. Скверныя помыслы, и еже услышати, или уведати, яко имать некто таково нечто, и рещи, се и инии, якоже аз, помышляют злая, — прокляни таковыя злыя помыслы. И о брате твоем рцы, яко больший мене есть и святейший, и почиет помысл. О плаче же, аще не понудишися к человеком, сый с ними, подвизатися не прияти дерзновения с некиим, плач, или умиление не приидет. И аще оправданием сотворят тя изыти от братии твоея, подвига и поприща сотворят тя бежати. Темже понудися победити, сый с человеки, еже к ним дерзновение. Глаголет бо апостол: «яко аще и подвизается кто, не венчается, аще не законно будет подвизатися» (2 Тим. 2, 5). Сотвори по силе своей, брате, и поможет ти Бог во всех. Не забуди еже хранити смирение, и послушание, и повиновение: и спасешися, о Христе Иисусе, Господе нашем, Ему же слава вовеки. Аминь.

Вопрос 341, другаго. Ин вопроси тогожде старца: авво, спастися хощу, и не вем пути спасения. И помысл глаголет ми: почто седиши зде во общежитии, ничтоже творя? Отыди инде. Что убо должен есмь сотворити?

Ответ Иоанна. Брате, даде нам Бог чрез Божественная Писания, и отцы, путь спасения, внегда глаголати: «вопроси отца твоего, и возвестит тебе, старцы твоя, и рекут тебе» (Втор. 32, 7). Темже аще хощеши не заблудити виною смирения, еже удалитися отонудуже имаши пользу, без вопроса и отец духовных, ничтоже да твориши, и не заблудиши благодатию Бога, Хотящаго всем человеком спастися и в разум истины приити.

Вопрос 342, тогожде. Помысл глаголет ми, яко аще отыду камо-либо, и убезмолвлюся, прииду в безмолвие совершенное. Должник бо есмь многих согрешений, и хощу свободитися от них. Како убо сотворю, отче?