Аскетика. Том I - авва Дорофей

Брате, аще хощеши спастися, стяжи смирение, послушание и повиновение вольное. И егда слышиши нечто от старца, что бы ни было, рцы ему со смирением: помолися о мне, отче, яко да даст Бог разум и бодрость, да не оскорблю тя. Сия сохрани и спасешися.

148. Тойжде брат, в недуг впад и бояся умрети, просил есть, со смирением многим, тогожде великаго старца о оставлении грехов, и о терпении потребном в недузе до конца. И отвеща ему тако:

Да не скорбиши, брате: смерть, бо кроме грехов, несть смерть, но прехождение от скорби в покой, от тьмы в неизглаголанный свет и в жизнь вечную. Глаголет же ти Бог, велий Царь: отпущаются тебе вся согрешения твоя, предварительно молитвами, и моленьми святых и ради твоея в Него веры, и да подаст ти терпение до конца.

149. Тогожде к томужде великому старцу вопрос. Владыко мой отче, в руках есмь Божиих и твоих. Сотвори убо милость свою до конца со мною, и ускори отрешити мя, предая мене Владыце моему Христу и наставляя святыми твоими молитвами, и спутешествуй на воздусе и в пути сем, его-же не вем.

Ответ. Христу, изволившу умрети за нас, Владыце небесе и земли и всякаго дыхания, предаю тя, брате, да утолит пред тобою страх смерти, и безпрепятствен восход сотворит души твоея, и да сподобит со дерзновением поклонитися Святей Троице, си есть, освобожденна, боящася же и трепещуща, якоже и Ангели, и да упокоит тебе со святыми Своими. Иди убо и молися о мне.

150. Ин брат болен, и в чахотку впад и зело бедствуя, моли тогожде старца помолитися о нем и испросити ему оставление грехов.

Ответ. Да не убоишися, брате; но паче да возрадуется душа твоя и да возвеселится о Господе. И веру ми ими, о Господе, со истиною, яко се простил есть Бог вся твоя согрешения, по прошению твоему, от детска доселе. Благословен восхотевый Бог, яко простил есть тебе вся. Да не скорбиши убо, ни единоже бо зло имаши: болезнь есть, и престанет.

151. Паки отягченну ему бывшу множае, нецыи братия молиша инаго старца, сказати им оный прежде сего ответ, о животе ли рече старец или о смерти.

Ответ Иоанна. О смерти есть. Может же испросити ему живот, аще извещение приимет от Бога.

152. И сия услышавше, молиша великаго старца испросити ему живот.

Ответ. Бог мой, Благий и Милосердый, еще и еще да исполнит вы радости Святаго Духа, аминь. О брате же: довлеет ему, аще что сподобился прияти: яко внезапу богат сотворися: и от раба свободен. Но благословен благоволивый и приемый моление Бог. Ничтоже убо рцыте брату, да не оскорбится. Но вы сохраните тайну сию. Несть бо ему смерть, но прехождение от смерти в живот вечный и от скорби в покой. Радуйтеся, чада возлюбленная о Господе.

153. Паки брату отягчавшу, и зело болезнующу, молиша тогожде великаго старца, да сотворит Бог, умолен быв от него, с братом скорую милость.

Отвеща великий старец:

Сего ради замедли в болезни, да не оставит себя бывшее о нем моление: и Бог полезное ему сотворил есть и творит молитвами святых, аминь.

И по ответе сем скончася с миром брат оный.

154. Старец некий авва Евфимий безмолвствуяй, послал есть молитву сию к томужде великому старцу: да чрез него Бог сотворит к нему ответ, противу вопросов сущих в молитве.

О Светодавче! Путь сущих во тме (просвети и нас сущих во мгле), Ты бо рекл еси, Святе: «просите и приимете; толцыте и отверзется вам» (Ин. 16, 24); и понеже хощеши и нам дверь отверсти спасения, ускори, начал бо еси. Аще бо не хотел был еси нас спасти, то не бы явил еси нам, яже от нас убо не возможна: от Тебе же Бога возможна. Сказал еси нам Святе: очисти себе, аще хощеши да прииду; и аз рех, Святе, яко брение очистити себе не может. И паки рекл еси нам Владыко: хотяй Моих сподобитися дарований, да уразумеет стези Моя во всех; и како может уразумети от рождества слепый родивыйся, аще не отверзутся его очи? Слепый ищет вождя, да не како обрящет себе малое служение. Ибо сын Тимеов Вартимей, седяше при пути прося милостыни: и егда услыша яко Свет правды путем тем мимоходит, воззва, глаголя: «Сыне Давидов! помилуй мя» (Мк. 10,47), и егда умилосердися благость Твоя, и призвал еси его, и рекл еси: что хощеши да сотворю ти? Он же рече: Учителю, да прозрю; и абие благость Твоя рече: прозри: и прозре, и виде Твоя следы, и последова Тебе. И аз хощу воззвати, и претит мне присно хотяй омрачити очеса видящих. Аще хощет благость Твоя призвати и мене и рещи, что хощеши, да сотворю тебе? Воззову и аз по оному: Господи, да отверзутся мои очи. Ибо прокаженный оный, аще бы могл себе очистити, то не бы воззвал: Господи, аще хощеши, можеши мя очистити, но очищал бы сам себе. И аз по оному зову: даждь и мне тойжде святый глас: хощу, очистися, и абие отыдет от мене проказа. И прозрев очищен быв, тогда уразумею следы Твоя еже ходити в след Тебе, яко Ты еси путь заблуждших. И тебе отца моего молю: ей, отче, помолися Владыце моему Христу, да отверзет мои очи, яко тебе имам руководителя приводяща мя Владыце Иисусу, яко Тому есть слава, со Отцем и Святым Духом, во веки веков, аминь.

Ответ. И ныне время есть благоприятно, еже воспети слово евангельское: «яко не требуют здравии врача, но болящии» (Лк. 5, 31). Аще убо болящий приидет ко врачу, достоит ему сохранити повелеваемая от врача. По рекшему: «веровати подобает приходящему к Богу, яко есть: и взыскующим его мздовоздатель бывает» (Евр. 11, 6). Верен бо есть рекий: «Воздам вам в нынешний век сторицею, и в будущий живот вечный» (Мк. 10, 30). Приходящии убо к великому нашему Врачу, просвещаются от Него, и врачует вся мысленныя их страсти. Да не похвалимся убо глаголюще: яко верни есмы: зане осудимся аки лицемери и невернии человецы. От видимых бо является неявляемая вера, живущая в сокровенных сердцах. Аще веруем Спасителю Христу глаголющему: «яко по вере твоей буди тебе», да речет и ныне к сущей в теле нашей души, яко «дерзай дщи, вера твоя спасе тя» (Мф. 9, 28). Темже убо не еже рещи, и провещавати устнами, сия есть вера наша: но совершенная наша вера от исцеления является. Аще убо веровал еси, и исцелился, ходи и да непреткнешися, и да не храмлеши. Исцелился ли еси? То яви, яко удержася ток твоея крове. И аще имаши сия, о человече! недалече еси, еже услышати Спаса глаголющаго к чистейшей твоей душе и краснейшей: «вся добра еси, ближняя моя, и порока несть в тебе» (Песн. 4, 7), и паки апостолу глаголющу: «не имущи скверны, или порока, или нечто от таковых» (Еф. 5, 25). Отверзеся убо нам дверь, и протяжеся путь вводящий в живот; и яко многими скорбми подобает нам внити в Царствие Небесное; и да претерпим в делании труда нашего. Воистину бо недостойны страсти нынешняго времене к хотящей славе явитися в нас. И несть неправеден Бог забыти толиких трудов, аще до конца удержим послушание: глаголет бо: претерпевый до конца, той спасется, о Христе Иисусе Господе нашем, аминь.

151. Тогожде к томужде великому старцу, вопрос аки в молитве, о скверных помыслех и о воскресении. Животе и Воскресение, посети ны, яко Твое создание есмы, и очисти ны от легиона злаго, Святе, яко умилосердился еси о создании Твоем, и изгнал еси легиона, и искаху бесове внити во свиния. Еда ли в безсловесныя свиния, или в мене словеснаго? яко приях я, и приидох по брегу в море, и биют мя волны, и не разумею. Ныне же бодет мя некто извнутрьуду возбудити кормчия, яко да подаст ми руку, и измет мя из глубины якоже сотворил есть Петру: и речет ко мне: «Почто усумнился еси, маловере?» — и понеже обещал ми еси угодником твоим Варсануфием во ответех его, положити нас во единой раце, еда ли купно и востанем? Боюся бо рекшаго: «два будета на селе, един поемлется, а другий оставляется: две мелюще в жерновах, едина поемлется, и едина оставляется» (Мф. 24, 40–41). И понеже от сотворения мира почивают человецы, и обретаются многажды телеса святых и грешных купно во едином гробе, еда ли и в воскрешение купно востанут? Егда приидут избраннии твои Ангели, возставити праведныя вся, или ни? Но едини ли избраннии? И сего ради бояся аз, молю чрез угодника твоего, да якоже явил еси, яко во единой раце уснем, тако да покажеши яко и купно воскресиши нас. И отца моего Варсануфия молю: яко прияхом нивы пожати аз и он: и аз изнемогох и не могу жати, да подвигнется и той аки силен, еже принести тебе Владыце и о мне рукояти правды. Ибо и у древних отец видим таковый пример: яко изыдоша три жати, и един от них якоже аз разболе, и возвратися в келлию свою, а тии ободришася, и прияша жатву: егда же исполниша жатву приидоша в домы своя, принуждаху и прияти мзду: он же вопреки глаголаше: кую мзду? за нюже не потрудихся, но вы потрудистеся? И понеже судишася с ним да приимет мзду, предпочтоша и отцы да приимет, и ублажен бысть суд их. Ты убо, Владыко Христе Боже, утверди моление мое сие: яко Твоя есть слава вовеки. Аминь.

Ответ Варсануфия. Яко человек домовит поставляет себе верны домостроители, дав им и ключи и имения своя, и весь дом: и от вернаго домостроителя есть, еже како уснути, и еже како пищу прияти, и еже како почтену быти от своего Господина: и с ким соводворятися, или со упивающимися, или со живущими честно; и овому убо предлежит мука, овому же блаженство. Тако и Бог наш, предпостави Себе верныя человеки домостроители, и ключи своя даде им, еже заключати и отверзати, сиесть самовластие. Оно же еже быти верными, зане крещаются вси христиане: и еже добре строити уверенная им, сиречь дела крещения, спасения ради своего. Аще убо совратится кто от них сего праваго пути? Бывает с пияницами часть его, упивающимися вином беззакония: таковый свиния есть словесная. И весте, что имать пострадати, пришедшу Владыце. Аще ли же добре устроит преданная ему, еже от Владыки блаженство ведают вси. Глаголет бо: «во всю землю изыде вещание их, и в концы вселенныя глаголы их» (Пс. 18, 5). О воскресении же: гумно есть век сей, и купно плевелы с пщеницею суть. Воскресению же бывшу, евангельский глас учит нас, яко смешенни востанут, сим, еже рещи: «и разлучит их друг от друга, якоже пастырь разлучает овцы от козлищ» (Мф. 25, 32). А яже о двою жену, и двою мужу, о скончании рече: о вере и неверии: яко напоследок едина восприемлется, и в единой стоит человек. А еже о жатве братий, от обою составися благое. Сам бо возболевый, имеяше произволение еже соделати, но воспряти его болезнь: тии же имеяху, яко молитвами брата болящаго укрепил есть их Господь. И обоих постиже благодать Святаго Духа, якоже убо Господь рече ко апостолом: «не радуйтеся, яко повинуются вам беси, но радуйтеся яко имена ваша написана суть на небесех» (Мф. 10, 25): тако и мы, да не взыскуем, все ли купно востанем, но услышати: «приидите благословеннии Отца Моего, наследуйте уготованное вам Царствие от сложения мира» (Мф. 25, 34): и еже быти купно со Иисусом, якоже рече Отцу. Яко тому слава вовеки, аминь.