История русской риторики. Хрестоматия - Аннушкин Владимир Иванович

Сия две вещи, сиречь художество воинственное и учение зело могут в жизни гражданстей и наипаче по премногу требуются действа риторическаго или красноглаголства (красноглаголания). И еже убо прилично есть к воинству, сиречь от части воинства елику ползу от красноглаголания (оно) приемлет. Мудрии между истязании благаго вожда и изящное красноглаголание исчисляют, от сея бо, глаголют, превеликия и изящныя ползы воинству производятся. Сице, яко от великаго поучения игемона (вожда) и изящнаго красноглаголания поставлени и подвизаеми воини всякая неудобная и страшная приемлют и, жестоко ратующе, крупно и вседушно устремляются на предложенную им славу и победу. Не тако трубныя гласы, приемлющыя (их) ушесами, наостряют и поущают души на брань, яко же слово игемоново к силе и славе оны подвизает.<… >

Вещество же риторическия силы суть повсемственно вся сущая в мире, зане ничто же есть всячески, о нем же бы ритор не возмогл свободно и прилично истязатися.<… >

Три убо суть роди вин: показателный, советствителный и судебный.<… >

Части убо риторическая или свойственная дела риторская суть пять, сиречь: обретение, изложение, красноглаголание, память и произношение. Обретение есть еже вымышляти истинныя (достоверная) вещи или подобная истинным, ими же да покажется достоверно, еже ритор показати тщится. Изложение есть обретшихся вещей по чину разделение. Красно(благо)глаголание есть пристойных глагол к обретенным вещем приличность (приуподобление). Память есть обретенных вещей и глаголов твердое воспоминание. Произношение, наконец, есть оная мерность тела и гласа, ея же обретеныя вещы и глаголы взыскуют.

Места риторския есть суть заданей (силлогизмов) престоли или седалища, и домы, или знамения, ими же является что в вещех изследовати подобает ритору.<… >

О определении. Определение есть слово толкующее, что есть оное, о нем же беседуется.<… >

О исчислении частей. Исчисление частей есть слово, им же некий род, или все на своя части разделяется.<… >

О этимологии, или ознаменовании. Этимология, или знаменование есть место, еже начало речений и знаменование разсмотряет.<… >

О сопряженных. Сопряженныя глаголются, яже от единаго речения рождена суща, различными пременении пременяются, яко чистота – от него же чистый, чисто, и еже чисту быти производятся.<… >

О роде и виде. Зело инако ритори род и форму или вид определяют, неже философи: ритори род определяют некое общо, еже обдержанием своим и знаменованием соплетаем себе и содержит некое обще, яко же наприклад, рещи: животное, еже обемлет человека, лва и прочее; древо обдержит дуб и кедр.<… >

О противных или противоположенных. Противных или противоположенных роди суть четыре; противна<… >зело разнствует между собою, яко добродетель и злоба, белость и черность.<… >

О припряженых, или обстояниих. Припряженная или обстояния суть яже с вещию или делом сопряжена суть; их же роди три суть: первый род есть припряженная, носящая вещи, яко место, время, одежда, содружение или товарыщество; вторый род есть припряженная души, яко злобы и добродетели; третий же род есть припряженная тела, яко красота, нелепость, сила и прочая. <… >

О противоборных. Противоборная глаголются, яже ниже известным правилом, ниже числом разнствуют, им же от противных и от неуподобителных разделяются, наприклад: любит его, прочее ниже его повредил, ниже его обесчестил, ниже бранми его гонил есть.<… >

О винах. Вина есть яже силою своею творит еже есть, яко же рещи: язва есть вина смерти, ибо силою своею смерть разит.<… >

О апотелесматех, или делех. Дела суть и глаголются, яже родишася от вин, яко день есть дело солнца.<… >

О сравнении. Сравнение есть егда сравняются две или многия вещи с иною некоею.<… >

Предсудие есть еже иногда разсмотрися, сиречь в суде и приносит ритор судиям образ, ему же да последует. Задание же от законов бывает, аще бы ритор показа, еже понуждается показати, яко требе есть быти; или зане в подобных делех, или в пристойных вещех к тому же делу некогда подобны суды принесошася.<… >

Еже суть писмена у грамматиков, тожде суть места у риторов и яко же убо от писмен бывают речения, тако и от мест израстают и возрастают словеса и задания. Не есть весма ни едина вещь обиднее (д. б. обильнее. – А. В.) обретения ко благоплодию, ко слову расположения действеннее и к силе воспоминания, кроме мест.<… >

Книга вторая

О красноглаголстве

Красноглаголство<…>есть некая пристойность приличных глав ко обретенным вещем. Разделяется на лепоту, достоинство и слог. Лепота убо есть еже творит видетися всякой вещи явно и отверсто глаголатися.<… >

Достоинство красноглаголства все востекает от начертаний; под именем же начертаний общне и тропи содержатся, обаче, аще свойственно и знаменателно глаголем, между собою зело разнствуют, зане тропос, понеже изыде от греческаго гласа трепо (сиречь пременяют), есть свойственно творение пременившихся речений, и елижды кое либо речение от свойственнаго знаменования в чуждое преносится, тропос глаголется.<… >

Начертания речений от тропосов разнствуют, зане тропи не могут быти разве в речениих пренесеных. Начертания же речений могут слагатися теми же реченми, яко: убих, убих врага отечества.<… >

Книга третия

О изложении и частех слова

Предсловие. Яко же обретение отверзает источники естества и благоглаголания делание, тако и изложение отверзает согласие суждения.<… >

Глава 1. О мудровании же и разсуждении изложения

Глава 2. О трегубом расположении, родственне, сиречь обще

Расположение от диалектиков разделяется общне на три рода: овое убо глаголется естественное, овое же хотетелное, или по хотению, овое же художественное.

Естественное есть тое, еже последует и подражает чин естественный.<… >

Хотетелное же или по хотению расположение есть еже не бывает известным подлогом, но созидается токмо от хотения глаголющаго или пищущаго.<… >

Художественное расположение есть еже управляется от художества совершения ради некоего преждеопределеннаго, или желания, или ползы, от коего совершения многащи не храня чин естества, прежняя последним подлагает. Сицевый чин есть творческий, иже художественне не начинают от начала вещы, но от конца начинают, или от среды.<… >

Книга четвертая и последняя

О показателном слове и о начале его и характире (изображении)<…>

Начинаем убо от дия, сиречь от Бога, яко же рече Феокрит, на похвалу Бога (Божию) две вещи смотряются: вещество и вид. Зде вещество именую епихириму (силлогисм) похвалы, сиречь пространнейшыя добродетели Божия, вид же – образ и характер (начертание, изображение).<… >