Молитвы ангелу-хранителю - Татьяна Лагутина

Тропарь преподобномученице Евгении

(6 января/24 декабря по старому стилю)

Агница Твоя, Иисусе, Евгения зовет велиим гласом: Тебе, Женише мой, люблю, и Тебе ищущи, страдальчествую, и сраспинаюся, и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но, яко жертву непорочную, приими мя, с любовию пожершуюся Тебе. Тоя молитвами, яко милостив, спаси души наша.

Молитва святителю Василию Великому

(14 /1 января по старому стилю и 12 февраля/30 января)

О, великий и преславный святителю Христов, всея Вселенския Церкве учителю богомудрый, Православия твердый исповедниче и поборниче, преблаженне отче Василие! Призри от высот небесных на нас, смиренно к тебе припадающих, и умоли Господа Вседержителя, Егоже верный на земли служитель был еси, да дарует нам веры правыя твердое и неизменное сохранение, Церкви Святей послушание, жития нашего исправление, и во всех нуждах, скорбех и искушениих скорое поможение, терпение же и укрепление. Подаждь нам твое святое благословение, да оным осеняемии, сие новое лето, и во вся дни богоугодно, в мире и покаянии, поживем, и во Царствии Небеснем сподобимся купно с тобою и со всеми святыми Живоначальную Троицу воспевати и славити, Отца и Сына и Святаго Духа, во веки веков. Аминь.

Тропарь преподобному Григорию Печерскому

(21 января/8 января по старому стилю)

Великих дарований приемниче и великих чудес силою Божиею творителю, пречудне отче Григорие, яко велие дерзновение имея ко Христу Богу, непрестанно о нас молися Ему, да грехов оставление подаст душам нашим.

Молитвы великомученице Татьяне

(25/12 января по старому стилю)

Моли Бога о мне, святая угоднице Божия Татьяна, яко аз усердно к тебе прибегаю, скорой помощнице и молитвеннице о душе моей.

О, святая мученице Татиано, невесто Сладчайшаго Жениха твоего Христа, агнице Агнца Божественнаго, голубице целомудрия, благоуханное тело страданьми, яко одеждами царскими, одеявшая, к ликом небесным сопричтенная, ликующая ныне во славе вечней, от дней юности служительнице Церкве Божия, целомудрие соблюдшая и паче всех благ Господа возлюбившая! Тебе мы молимся и тебе мы просим: внемли прошениям нашим сердечным, и не отвергай молений наших! Даруй чистоту тела и души, вдохни любовь к Божественным истинам, на путь добродетельный введи нас, ангельское охранение испроси у Бога нам. Наши раны и язвы телесныя сотвори безболезненны, в злострадании терпение даруй. Греховныя язвы уврачуй, юность огради, старость безболезненну и безбедну даруй, в смертнем часе помози! Поминай наши скорби и отраду даруй!

Посети нас, сущих в темнице греха: на покаяние настави скоро, возжжи пламень молитвы, не оставь нас сирых, да славяще страдания твоя, возсылаем хвалу Господу ныне и присно и во веки веков. Аминь.

Молитва равноапостольной Нине, просветительнице Грузии

(27/14 января по старому стилю)

О, всехвальная и предивная равноапостольная Нино, воистину великое украшение Церкве Православныя и изрядная похвало народу иверийскому, просветившая всю страну Грузинскую Божественным учением и подвигом апостольства победившая врага нашего спасения, трудом и молитвами насадившая зде вертоград Христов и возвращшая его в плод мног. Празднующе святую память твою, притекаем к честному лику твоему и благоговейно лобызаем всехвальный дар тебе от Божия Матере, чудотворный крест, егоже ты обвила еси драгими власы твоими, и умильно просим, яко присную предстательницу нашу: огради нас от всяких зол и скорбей, вразуми врагов святыя Церкви Христовы и противников благочестия, охраняй твое стадо, упасенное тобою, и моли Всеблагаго Бога, Спасителя нашего, Емуже ты ныне предстоиши, да дарует православным христианом мир, долгоденствие и во всяком добрем начинании поспешение, и да приведет Господь нас в Небесное Свое Царствие, идеже вси святии славословят всесвятое Его имя ныне и присно и во веки веков. Аминь.

Молитва преподобному Антонию Великому

(30 /17 января по старому стилю)

О, великий угодниче Божий, преподобне отче Антоние! Яко имея дерзновение ко Владыце Христу и ко Пречистей Его Матери, буди о нас, недостойных, молитвенник теплый, заступая нас от всяких бед и напас тей, да твоими молитвами невредимы от враг видимых и невидимых пребудем. Моли милосердие Божие, да спасет нас от прегрешений наших имиже веси судьбами. Моли благость Его, еже милостивно храму (дому) сему потребная даровати, жизнь нашу умирити и вся прихожаны храма сего помиловати и спасти души наша, да непрестанно славим, хвалим, поем и величаем Пречестное и Великолепое имя Отца и Сына и Святаго Духа, ныне и присно и во веки веков. Аминь.

Конец ознакомительного фрагмента.