Помощь небесных покровителей. Полный сборник молитв на каждый день года (зима) - Таисия Олейникова

Тропарь благоверной княгине Иулиании Вяземской, Новоторжской, глас 2

Благочестно в законе поживши и благими делы украсившися, яко крепкий адамант явилася еси, целомудренная святая благоверная княгине Иулиание: тленную бо славу и добротство телесное презревши, злокозненнаго врага победила еси и целомудрия ради мученическую смерть прияла еси. Сего ради от Христа Бога нетленным и вечным венцем венчавшися, ныне с лики мученик ликуеши, и нам велия чудеса, приходящим ко гробу твоему, обильно источаеши. Темже ти вопием: молися Христу Богу о всех нас, с верою и любовию страдания твоя почитающих.

Кондак, глас тойже

Воспоем днесь Благодетеля всех Бога, прославльшаго в России Иулианию богомудрую, да молитвами ея подаст душам нашим грехов оставление и велию милость.

Величание

Величаем тя, святая благоверная княгине Иулиание, и чтим святую память твою, ты бо молиши за нас Христа Бога нашего.

Молитвы блаженному Прокопию, Вятскому чудотворцу

Молитва первая

из службы

О подвижниче многотрудный и кроткий, молитвенниче усердный и любвеобильный целебниче, святый блаженный Прокопие! Града Хлынова украшение, Вятския земли Небесный молитвенниче! Кия похвалы принесем тебе, святче Божий? Како воспоем тя? Токмо, молящеся тебе, воспоминаем дивныя подвиги твоя. Ты из детства Богоугодно пожил еси, послушание родителем и трудолюбие являя. В возраст пришед и услышав словеса Спасителя: Аще кто хощет по Мне ити, да отвержется себе, и возмет крест свой, и по Мне грядет, – и: Кто любит инаго паче Мене, недостоин есть Мене, – ты, блаженне, послушен быв Христову слову, делом и жизнию отвещавая на заповеди Его, и ради любви к Нему всего отреклся, возлюбил еси чистоту и целомудрие, молчанием уста заградив, да непрестанно умом с Богом беседу твориши и молишися Ему, и по слову апостола Павла: Мы буи Христа ради, вы же мудри о Христе, – подвиг особый и многотрудный восприял еси на ся, являя себе, яко безумна и юродива пред людьми, разум же совершен имея, почитая всех лучшими себе и в сем подвизе до смерти пребыл еси. Ты, ранее всех к Божественным службам приходя, последним исходил еси из храма; обходя храмы града, на папертех молился еси днем и нощию. Гладом и жаждою томяся, зной и мраз зимний терпя, мало прикрывая наготу свою, босыми ногами по снегу ходил еси, посмеяние и биение от людей неразумных терпя, за обидчики моляся, с клятвою прещая духовнику своему, да не открыет беседу и подвиг людем. За таковыя подвиги Господь Бог прослави тя даром исцеления болезней и недугов и предведения грядущаго: многим бо предрекал еси образами готовитися покаянием к смерти, другая же радостно воздвигал еси от одра болезни, темничное заключение или от него избавление и общия бедствия предвещая, призывал еси к покаянию. Пред кончиною твоею, юже откры тебе Бог, тело твое снегом отирая, омыл еси и, много молився, почи от трудов праведных, душею же в Небесныя обители от Бога приятый, оттуду являлся еси с преподобным Трифоном, даруя исцеления.

Молим тя, святый Прокопие: яко имея дерзновение у Господа, испроси нам жизнь мирную, от соблазнов и козней диавольских избави; храм сей, град наш и всю страну нашу сохрани в мире, от врагов защити; земли плодоносие, воздуха благорастворение, вод освящение, изобилие плодов и вся потребная для жизни сей даруй людем, чтущим тя и молящимся тебе; нам и всем православным христианом испроси у Спасителя Христа Бога в христианских добродетелех пребывати, веру и любовь к Богу всегда имети, с надеждою стремитися к жизни вечней; смирения и терпения, кротости и воздержания исполнитися; молитве неразсеянней и непрестанней научитися, христианския кончины жизни нашел, безболезненны, мирны с покаянием и приобщением Христовых Таин сподобитися, такожде и добраго ответа на страшнем судилищи Христовем, да, твоими молитвами ограждаеми и сопутствуеми, достигнем вожделенныя жизни вечныя в Царствии Божием, да тамо вкупе с тобою и всеми святыми славим Отца и Сына и Святаго Духа, ныне, и присно, и во веки веков. Аминь.

Молитва вторая

из акафиста

О блаженне Прокопие! Велие имея дерзновение к Богу, молися выну о всех нас, зане буря многих бед и скорбей обдержит ны: недузи телесныя, болезни дущевныя, приражения вражия обуревают ны. Ходит бо враг наш, иский кого поглотити, и ежечасно от того уловляемся: о спасении же своем нерадяще, несмы достойни воззрети на высоту небесную. Но ты буди нам помощник скорый и избавитель. Яко сам досаждаемь быв от врага, победив же сего добльственне, вразуми ны, да разумеем того коварства. Подаждь нам память смертную, слезы покаяния и надежду спасения: да не во отчаяние впадем, ниже дерзостным на милосердие Божие упованием, во гресех же пребыванием в конец себе погубим, но да будет нам память грехов наших во источник теплых слез и сокрушения сердечнаго, милосердие же Божие и благодать Его, молитвами твоими в спасение наше, ныне и присно и во веки веков. Аминь.

Тропарь блаженному Прокопию, Христа ради юродивому, Вятскому, глас 4

Иже на земли Христа ради волею в буйство преложися, и мира сего красоты отнюд возненавиде, и плотская играния увядив постом и жаждею и на земли леганием, от зимы студению и мразом, и от зноя солнечнаго и дождя и прочия тяготы никогда же уклонися под кров, и на теле своем не имея одеяния, Божиею помощию покрываем, и душу очистил еси добродетельми своими, яко злато в горниле, Прокопие премудре, с верою творящим память твою честно и усердно притекающим к мощем твоим, прославляюще твое святое успение, Христу Богу моляся, благоюроде, да избавит ны Господь от варварскаго нашествия и междоусобныя брани и мир мирови дарует и душам нашим велию милость.

Ин тропарь, глас тойже

Велию любовь ко Господу в себе имея, все претрудное житие твое во граде Хлынове, юродствуя, провел еси, блаженне Прокопие, зной и мраз, глад и жажду благодушно терпя, биение и поношение от людей безбожных радостно принимал еси, подвижниче добропобедный, любовию же и добром велиим за зло воздавая, мнозем предрекал еси их ожидающее и от недугов исцелял еси, беззлобне. Темже, наслаждаяся ныне в сонме святых, моли Господа помиловати град и люди, тя почитающия.

Ин тропарь, глас 8

Ангельски живя на земли Богоугодно, многия скорби и труды терпеливо неся, добродетельми и дарованиями от Бога украсився, предвещая грядущая и исцеляя болезни, безмолвно, непрестанно моляся, юродствуя, скрыв дарования своя, ныне наслаждаяся в селениих святых, святый блаженне Прокопие, моли Христа Бога спастися душам нашим.

Кондак, глас 2

Возбранному и дивному в праведницех мужу, волею во юродство претворившуся, мира сего красоты возненавидел еси, плотская мудрования увядил еси постом и жаждею, студению мраза, снега и зноя, и дождя, и от прочия воздушныя тяготы никогда же уклонися и очистил еси себе, яко злато в горниле, Прокопие блаженне, всей Вятской земли похвала и утверждение.

Ин кондак, глас 8

Многою любовию к Богу пламенея, любви и смирению людей безмолвно учил еси, деянием будущая являя, недуги и болезни целил еси. На путь спасения нас настави, от язв греховных исцели, Прокопие блаженне, о всех нас Христа Бога моли.

Величание

Ублажаем тя, святый праведный Прокопие, и чтим святую память твою, ты бо молиши за нас Христа Бога нашего.

22 декабря/4 января

Великомученицы Анастасии Узорешительницы, или Фармаколитрии (ок. 304).

Молитва великомученице Анастасии, именуемой «Узорешительница»

из акафиста

О многострадальная и премудрая великомученице Анастасие! Ты душею на небеси у престола Господня предстоиши, на земли же, данною тебе благодатиею, различная совершаеши исцеления. Призри убо милостивно на предстоящия люди и молящияся пред пречистым образом твоим, просящия твоея помощи: простри ко Господу святыя молитвы твоя о нас, и испроси нам оставление согрешений наших: недужным исцеление, скорбящим и бедствующим скорую помощь; умоли Господа, да подаст всем нам христианскую кончину и добрый ответ на страшнем суде Своем, да сподобимся и мы купно с тобою славити Отца и Сына и Святаго Духа во веки веков. Аминь.

Тропарь великомученице Анастасии Узорешительнице (Фармаколитрии), глас 4

Победоноснаго Воскресения истинноименитая наречена еси, мученице Христова, победы на враги поставила еси мук терпением, Христа ради, Жениха твоего, Егоже возлюбила еси. Того моли спасти души наша.

Кондак, глас 2

Во искушениих и скорбех сущии, к твоему храму притекающе, приемлют честная дарования от живущия в тебе Божественныя благодати, Анастасие, ты бо присно миру точиши исцеления.

Величание

Величаем тя, страстотерпице Христова Анастасие, и чтим честное страдание твое, еже за Христа претерпела еси.

Великомученице Анастасии Узорешительнице молятся о помощи в трудных родах и об освобождении из плена и заточения.