Молитвенное приношение старца Софрония - Архимандрит Софроний (Сахаров) Сахаров

ГОСПОДИ, БОЖЕ НАШ, Егоже слава неизреченна и милость безмерна, Егоже царство непреемно и владычество непреложно, в вере и надежде усопшаго раба Твоего (имя) в рай сладости упокой, и душу его со всеми от века Тебе благоугодившими всели; молим Ти ся, услыши и помилуй.

ГОСПОДИ СИЛ, скорбящих радосте, и плачущих истинное утешение, и всех в малодушии сущих державное заступление сый, милостию и щедротами Твоими посети сокрушенныя рабы Твоя, и всяку болезнь в сердцах их исцели: раба же Твоего (имя) в надежде воскресения усопшаго в недрех Авраамлих упокой, и лику спасенных Твоих сопричти; молим Ти ся, услыши и помилуй.

БОЖЕ, Боже наш, иже всем человеком жития предел положивый, и время исхода из мира сего определивый во благом Твоем промышлении о всех нас: молим Тя, Всеблагий, усопшаго раба Твоего (имя) милостивно приими, и якоже на земли в Церкви Твоей служителя Престолу Твоему явил еси и совершителя святых Твоих Тайн поставил еси, тако и ныне, в пренебеснем Твоем жертвеннице сослужителя горних чинов того покажи; и якоже в человецех духовным достоинством сего украсил еси, тако и ныне, в собор святых неосужденна того вчини; и якоже зде живот его даром священства прославил еси, тако и ныне, Сам Ты, Господи, прославлявшаго Тя, славою вечною на небеси прослави, и дух его со всеми от века Тебе благоугодившими совокупи в невечернем дни Царствия Твоего, Христе: Ты бо еси воскресение, и живот, и покой всех возлюбльших пришествие Твое, и Тебе славу возсылаем со Отцем и Святым Духом, ныне и присно и во веки веков.

Аминь.

МОЛИТВЫ НА РАЗНЫЕ СЛУЧАИ ЖИЗНИ

Молитвы на освящение автомобиля

Молитва первая

ГОСПОДИ ИИСУСЕ ХРИСТЕ, благословляяй и освящаяй всяческая молитвою и призыванием всесвятаго Имене Твоего, благослови колесницу сию, юже раб Твой (имя) стяжа, и да будет сия ему во благую потребу, в служение нуждам его и ближних.

Ей, Господи, приклони ухо Твое и услыши нас в час сей, и благословением Твоим сохрани раба Твоего и всякаго инаго, ею пользующегося от всякаго сопротивнаго обстояния и всякаго вреда человеком ли, или скотом.

Твое бо есть еже миловати и спасати ны, Боже наш, и Тебе славу возсылаем со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, БОЖЕ НАШ, безначальне, блаже, Содетелю всех и Творче всего сущаго, Едине Святе, Едине по существу безгрешне, научивый ны Божественным Твоим словом почитати вся Тобою созданная добра быти, и заповедь давый праотцем нашим, еще в рай сущим, возделывати ея, молим Тя, Владыко Святый, призыванием всесвятаго Имене Твоего и окроплением воды сея священныя, благослови колесницу сию, юже стяжа раб Твой (имя), и даждь ему надежду, яже о Тебе, и сохрани его от всякия беды и напасти пользующемуся и всякому иному живому существу, Тобою созданному. Ты бо еси Бог всяческих, Ты един еси Хранитель Святый и Заступник державный, и Тебе славу вси возсылаем, ныне и присно и во веки веков.

Аминь.

Молитва на благословение иконы спасителя

СЫЙ БОЖЕ ОТЧЕ, Вседержителю покланяемый, достойно есть яко воистинну, и праведно, и лепо великолепию святыни Твоея Тебе кланятися и Тебе славити, Единаго воистинну Сущаго Бога; безначальне, непостижиме, неописанне, неизменне, призри милостивно на ны и на образ сей Единороднаго Твоего Сына, Иже сый сияние славы Твоея и существа Твоего неизменное начертание носит вся глаголом силы Своея; и Бог сый превечный на земли явися, и от Девы Святыя воплощься истощи Себе, зрак раба приемь, сообразен быв телу смирения нашего, да нас сообразны сотворит образу славы Своея; Иже даде Себе измену смерти, сошед Крестом во ад, и воскрес в третий день, и возшед на небеса, седе одесную величествия Твоего на высоких. Сего ради, Отче Всесвятый, и мы, смиреннии раби Твои, сотворихом сей образ возлюбленнаго Христа Твоего, и просим, и молим Тя: благоволением благости Твоея, низпосли Духа Твоего Святаго на икону сию, во еже благословити и освятити ю, яко да вси молящии пред нею услышани будут от Тебе, и приимут небесное Твое благословение, и благодать Святаго и животворящаго Твоего Духа, и освящение Единороднаго Твоего Сына.

Яко Ты еси освящение наше, и Тебе славу возсылаем, ныне и присно и во веки веков.

Аминь.

Молитвы на благословение дома

Молитва первая

УПОВАНИЕ НАШЕ, ХРИСТЕ, заповедь давый учеником Твоим: егда входити в дом, призывати мир Твой на него, и на всех живущих в нем, Сам Всеблагий, низпосли мир Твой на рабы Твоя (имена), зде обитающих и Тебе нами недостойными мольбы и моления приносящия. Ей, Владыко Христе, услыши нас ныне и милость Твою богатую излей на вся ны. Ты бо веси вся скорби наша и немощь естества нашего. Темже не посрами нас, надежду нашу на Тя Единаго возложивших и инаго заступления в мире сем кроме Тебе не имущих. Буди нам покров и ограждение, покой и радование, мир и крепость, спасение и освящение. Ты бо еси Бог наш, и Тебе славу возсылаем на всяк день, со Отцем и Святым Духом, всегда, ныне и присно и во веки веков.

Аминь.

Молитва вторая

ГОСПОДИ, ИИСУСЕ ХРИСТЕ, Спасителю наш, во дни плотскаго Твоего пришествия и пребывания с нами изволивый внити под сень Закхееву и спасение тому и всему дому его бывый: Сам, всеблагий наш Господи, и ныне благослови всех зде живущих рабов Твоих и благодатию Твоею неотступно пребуди с ними во вся дни живота их, и соблюди их невредимы от всякаго навета вражия, даруя им мир Твой, Господи, якоже и святым Твоим апостолом. Твое бо есть еже миловати и спасати нас, Христе Боже наш, и Тебе славу возсылаем со Отцем и Святым Духом, ныне и присно и во веки веков.

Аминь.

Молитва на построение и освящение дома

ГОСПОДИ ИИСУСЕ ХРИСТЕ, един сый воистину краеугольный Камень, на немже зиждется всякая жизнь, призри милостивно на рабы Твоя (имена), изволившия в надежде на Тя воздвигнута дом сей в жилище себе, и в державе крепости Твоея основай его на твердом камене, Иже основавый землю на тверди ея, яко да ни ветр, ни вода, ни огонь, ни гроза, ни оружие бранное, ни землетрясение, ни ино что поколебати или повредити возможет и.

Благоволи же, Христе, упование наше, в богатстве милости Твоея, строение сие в конец благополучно привестися, и на рабов Твоих сих, хотящих в нем жити, благословение Твое низпосли, и щедроты Твоя обильно излей. Даждь же им и Ангела мирна, храняща их от всякаго навета сопротивнаго во вся дни живота их.

По исходе же их из мира сего, во времена, ихже положил еси во власти Твоей, егда отложити им телесную сию храмину, приими их во обители светлыя дому Отца Твоего по обетованию Твоему, и насладитися еже в Тебе непреложнаго мира и радости нетленныя сподоби.

Ты бо еси покров нам, прибежище, и сила, и Тебе славу возсылаем, со Отцем и Святым Духом, во веки веков.

Аминь.

Молитва о единстве для семьи или прихода

ГОСПОДИ ИИСУСЕ ХРИСТЕ, Агнче Божий, вземляй грех мира, восходом Твоим на Голгофскую Гору искупил еси ны от клятвы законныя и восставил еси Твой падший образ, на Кресте пречистеи руце Твои прострый, да чада Божия расточенная собереши во едино, и ниспосланием Пресвятаго Духа в соединение вся призвавый, Ты убо, Сый Отчее сияние, перед исходом Своим на сие великое мироискупительное священнодействие, молился еси Отцу Твоему, да будем вси едино, якоже Ты един еси со Отцем и Духом Святым, даждь убо нам благодать и мудрость исполнити сию заповедь на всяк день, и укрепи нас на подвиг тоя любве, юже заповедал еси нам, рекий: да любите друг друга, якоже возлюбих вы. Духом Твоим Святым даждь нам силу смирятися друг перед другом, поминая, яко аще кто больше любит, той и больше смиряется; научи нас молитися друг за друга, нести тяготы друг друга в терпении и объедини нас союзом любве неразрушимыя во едино стадо послушных овец о Имени Твоем святем, даруя нам и зрети в коемждо брате и сестре нашей образ Твоея неизреченныя славы и не забыти, яко брат наш есть наша жизнь.

Ей, Господи, собравый нас благоволением Твоим, сотвори нас быти воистину во едину семью, живущую единым сердцем, единей волей, единей любовию, яко един человек, по предвечному совету Твоему об Адаме первороднем. Осени дом наш (или приход наш) Духом страха Твоего, и покрый его покровом Пречистыя Твоея Матере и всех святых Твоих, благословляяй и заступаяй коегождо зде живущих (имена), сохраняя же нас всех от тлетворных помыслов, от неподобающих слов или движений сердечных, могущих разрушити священное дело нашего служения, яко да созиждется дом сей (приход сей) на камне евангельских Твоих заповедей местом исцеления, освящения и спасения, ради нас самих и ради всех притекающих семо, труждающихся и обремененных братьев и сестер наших, да обрящем вси покой в Тебе, кротком и смиренном Царе нашем, ныне и присно и во веки веков.