Молитвенное приношение старца Софрония - Софроний Сахаров

О плачущих

ГОСПОДИ СИЛ, скорбящих радосте и плачущих истинное утешение, и всех в малодушии сущих укрепление сый: милостию Твоею посети рабы Твоя (имена) и всякую болезнь в сердцах их исцели; молим Ти ся, услыши и помилуй.

О болящих

ГОСПОДИ БОЖЕ НАШ, едине душ и телес наших истинный Врачу, с сердцем сокрушенным к Тебе припадаем и стеняще вопием Ти: исцели болезни, уврачуй страсти душ и телес рабов Твоих, братий и сестер наших в недузех и скорбех сущих и на одре болезни лежащих (имена) и всех заповедавших нам, недостойным, молитися о них.

Прости им, яко Благосерд, вся прегрешения их вольная и невольная, запрети болезни, отстави всякую страсть и всяк недуг, простри крепкую руку Твою, и якоже тещу Петрову от одра болезни воздвигни и здравых представи Церкви Твоей Святей и ближним их; молим Ти ся, всещедре Господи, услыши ны и скоро помилуй.

ВЛАДЫКО ВСЕДЕРЖИТЕЛЮ, Царю Святый, телесныя скорби исправляяй человеком, молимся Тебе: врачебную силу Твою с небесе низспосли на страждущия рабы Твоя (имена), и возстави их от ложа озлобления целы и всесовершенны, и даруй их Церкви Твоей Святей благоугождающа и творяща волю Твою; молим Ти ся, услыши ны и скоро помилуй.

ЧЕЛОВЕКОЛЮБЧЕ ГОСПОДИ, благоутробне и многомилостиве, едине истинный Врачу, исцели рабы Твоя (имена) и милостию Твоею посети их, яко да возставше силою Твоею от одра немощи своея со всяким благодарением поработают Тебе прочее время живота своего; молим Ти ся, услыши ны и помилуй.

ПРИЗРИ С НЕБЕСЕ, благоутробне Господи, на страждущия рабы Твоя, братия и сестры наша, в недузех и скорбех сущия (имена), и невидимою рукою Твоею от одра болезни воздвигни, свобождая их от всякаго недуга и язвы, таящияся в них; очисти их от всякия скверны душевныя и телесныя, и сохрани прочее время живота их в мире и целы, ходящия во оправданиих Твоих, яко да и в сих прославится всесвятое Имя Твое; молим Ти ся, всещедре Господи, услыши и помилуй.

ВРАЧУ И ПОМОЩНИЧЕ в болезнех сущих, Избавителю же и Спасе скорбьми сокрушенных, Владыко Христе, милостию Твоею скоро посети страждущия рабы Твоя (имена), изымая их от всякаго озлобления богатством щедрот Твоих; молим Ти ся, услыши и помилуй.

Молитвы за священников и духовников

Молитва первая

ГОСПОДИ ИИСУСЕ ХРИСТЕ, Боже Спасителю наш, помилуй и спаси раба Твоего (имя), и молитвами служителя Твоего прости ми, немощному и недостойному, вся грехи моя; излей на мя милость Твою, якоже излил еси, Господи, на жену хананейску; пощади мене и ущедри, низпосли ми благословение Твое, и буди ми Хранитель Святый и Помощник державный; соблюди мя от всякаго дела и слова душетленнаго, Тебе, Богу моему неугоднаго и брату моему неполезнаго; покрый мя от всех козней и наветов вражиих; исправи стопы моя пред Тобою; утверди мя в любви Твоей; и даждь ми, немощному паче всякаго человека, неосужденно причащатися святых Твоих и безсмертных Тайн, просвети мя, до конца омраченна, светом заповедей Твоих; облагоухай мя, недостойна, благоуханием безстрастия Твоего, и Духом Твоим Святым возведи живот мой от тли и сени смертныя к нестареемей жизни во Царствии Твоем, Господи.

Ей, Господи, молитвами отца моего, служителя Твоего, услыши мя в скорби моей, и вонми молению моему в печали моей. В безмерной благости Твоей низпославый Духа Святаго Утешителя на святыя Твоя ученики и апостолы, даждь и мне, окаяннейшему всякаго создания, дар Духа Твоего Святаго, да укрепит мя и наставит на всяку истину и на всякое дело благое послушания.

Аминь.

Молитва вторая

ГОСПОДИ ИИСУСЕ ХРИСТЕ, Боже Спасителю наш, помилуй и спаси раба Твоего (имя), и за его молитвы прости мне грехи моя и излей на мя благословение Твое. Буди ми, недостойному и немощному, Хранитель Святый, Помощник державный; соблюди мя от всякаго дела и слова душетленнаго и неугоднаго Тебе; покрый мя от всех козней и наветов вражиих; исправи пред Тобою стопы моя; утверди мя на камени заповедей Твоих; просвети мя нетленным светом повелений Твоих, и Духом Твоим Святым возведи мя от тли и сени смертныя к нестареемей жизни во Царствии Твоем.

Боже, Боже мой, буди милостив мне, грешному, молитвами отца моего духовнаго.

Аминь.

Молитва третья

ВЛАДЫКО ВСЕДЕРЖИТЕЛЮ, Господи Иисусе Христе, пребезначальнаго Отца собезначальный Сыне и Слове, неизреченнаго ради милосердия Твоего все домостроительство спасения нашего прекрасне совершивый, и по безмерному благоволению Твоему вручивый немощным людем служение сему великому таинству спасения мира, Сам Ты, Господи, в благости Твоей ущедри и помилуй раба Твоего (имя), прости ему вся прегрешения его вольная и невольная, соблюди его невредима от всех козней вражиих; заступи его от всякаго нападения неприязненнаго, неизменно храни его в путех воли Твоея и во истине слова Твоего, благодатию Твоею восполняя всякое неможение или неведение его.

Ей, Владыко Христе, по многому Твоему снисхождению и крайнему человеколюбию, положивый и сего раба Твоего (имя) во еже приносити Тебе дары же и жертвы духовныя о людех Твоих, Духом Твоим Святым укрепи его в службу сию и даждь ему слово во отверзении уст его, во еже призывати благословение Твое на наследие Твое, и да почиет благоволение Твое на всем деле служения его.

О Боже, Боже наш, даждь и сему рабу Твоему нести в мир свидетельство о истине Твоей, и Сам Ты свидетельствуй о нем, якоже свидетельствовал еси в веках о святых Твоих апостолех и о наследницех их, отцех наших, яко да и в нем, и в служении его прославится всесвятое Имя Твое со Отцем и Духом Святым.

Мене же, недостойнаго раба Твоего, за молитвы служителя Твоего очисти от всякия скверны плоти и духа, и презирая вся моя беззакония и грехи, вразуми мя к познанию истины Твоея, не скрый от мене света заповедей Твоих, силою Твоею удержи мя в путех воли Твоея, и даждь ми все прочее время жизни моея совершити непорочно пред лицем неизреченныя славы Твоея, да не лишуся, по безумию моему, радости спасения Твоего и участия в наследии святых Твоих, от века Тебе благоугодивших.

Аминь.

Молитва четвертая

ГОСПОДИ БОЖЕ НАШ, создавый нас и введый в жизнь сию, показавый нам в безмерности благоволения Твоего к роду человеческому пути во спасение и даровавый нам откровение небесных тайн, и положивый в службу сию немощью плоти обложенных людей, сотвори милость Твою с рабом Твоим (имя), прости ему всякое согрешение его вольное и невольное, благодатию Твоею исцели всякое неможение его и светом познания Твоего свободи его от всякия тьмы неведения; Духом Твоим Святым утверди его во истине исповедания Твоего и в путех воли Твоея святыя и всесовершенныя. Даждь быти ему служителем Новаго Завета Твоего, слугою непостижимых Таинств Твоих; сотвори его достойна быти приносити Тебе жертвы духовныя о людех Твоих; всякое благое прошение его и молитву приими во святый и пренебесный Твой жертвенник, в воню благоухания, низпосылая благодать Святаго Твоего Духа, яко да и в нем прославится всесвятое и великолепое Имя Твое, Отца, и Сына, и Святаго Духа.

Аминь.

Молитва пятая

Иже неизреченных и невидимых тайн Боже, у Негоже сокровена суть источницы премудрости и разума, источницы силы и света; непостижимый во всех путех Твоих и делех, даждь ми, недостойнейшему всех человек, благословение Твое на службу мою, и за молитвы духовнаго отца моего, укрепи мя в служении сем. Ей, Господи, презирая вся моя беззакония и согрешения, вразуми мя к познанию истины Твоея и любви Твоея к человеку. Ты бо, Господи, умовением ног апостол Твоих давый нам образ служения ближнему, приими и мою малую и ничтожную службу сию, юже совершаю аз немощный по заповеди Твоей (отцу или матери моей, брату или сестре моей, или вообще страждущим и болящим), со всяким благоволением, и утверди мя в любви Твоей до конца. О Господи, помоги мне.

Аминь.

Молитва шестая

ГОСПОДИ ИИСУСЕ ХРИСТЕ, милостивый Спасителю наш, помилуй и спаси раба Твоего (имя) и за многое благоволение Твое излей на него благословение Твое.

Аминь.

МОЛИТВЫ ЗА УСОПШИХ

Прошения о усопших

ГОСПОДИ ИИСУСЕ ХРИСТЕ, Источниче жизни и безсмертия, милостивно приими усопшаго раба Твоего (имя), о надежде живота вечнаго почившаго, и не помяни грехов его, в житии сем приключьшихся ему, но да будет ответ его благоприятен на страшнем судищи Твоем; молим Ти ся, услыши и помилуй.

ВОСКРЕСЕНИЕ сый и живот всем верующим в Тя, Иисусе Христе, в вере и надежде воскресения усопшаго раба Твоего (имя) со святыми упокой; молим Ти ся, услыши и помилуй.